Մարությանը չպատասխանեց, թե որքան է վճարելու երևանցին՝ Գորան Բրեգովիչին Երևան հրավիրելու համար (տեսանյութ)
Այսօր, Երևանի ավագանու նիստի ժամանակ, ԲՀԿ խմբակցության անդամ Հռիփսիմե Առաքելյանը հետաքրքրվեց, թե որքա՞ն է արժեցել երաժիշտ Գորան Բրեգովիչին Երևան հրավիրելը բյուջեի վրա:
«Մենք հրավիրում ենք ոչ այնքան հայտնի մի երաժշտի և ինձ հետաքրքրում է, թե ինչու ենք հենց նրան հրավիրում, ու որքա՞ն գումար պետք է մենք տանք այդ երաժիշտին»,-հարցրեց Առաքելյանը։
Փոխքաղաքապետ Հայկ Սարգսյանը նշեց, որ ինքը տեղյակ չէ, թե որքան է այդ երաժշտի հոնորարը, իսկ քաղաքապետ Հայկ Մարությանն էլ նկատեց, որ եթե Հռիփսիմե Առաքելյանը ուզում է այդ մասին իմանալ՝ թող նամակով հացադրում անի։
«Եթե կարիք կա, գրավոր կարող եք դիմել, կպատասխանենք»,-ասաց նա։
«Ախր հիմա մենք այդ հարցն ենք քննարկում, և ուղիղ հարց եմ ուղղում, ինչո՞ւ չեք պատասխանում»,-հարցրեց ավագանու անդամը։
«Ես արդեն ասացի՝ գրավոր կուղղեք հարցը, եթե չեք ուզում՝ մի ուղղեք»,-ասաց Հայկ Մարությանն ու անցավ հաջորդ հարցին։
Հիշեցնենք, որ Ամանորի միջոցառումների համար կառավարությունը հատկացնում է 271 մլն դրամ, իսկ Երևանի բյուջեից կհատկացվի 54 մլն դրամ:
Մանրամասները՝ տեսանյութում