ԱԱԾ և ՀՔԾ պետերի հեռախոսազրույցի գաղտնալսման գործով որևէ անձ չի ձերբակալվել․ ՔԿ
www.Politik.am կայքը քիչ առաջ լուր է հրապարակել` «Վանեցյանին և Խաչատրյանին գաղտնասլած անձը ձերբակալվել է․ նա ՌԴ քաղաքացի է» վերտառությամբ:
Հրապարակման առնչությամբ Քննչական կոմիտեն հայտնում է, որ ԱԱԾ նախկին ղեկավար Արթուր Վանեցյանի և ՀՔԾ պետ Սասուն Խաչատրյանի հեռախոսազրույցի գաղտնալսման և հրապարակման դեպքի առթիվ քննվող քրեական գործով կասկածյալի դատավարական կարգավիճակ ունեցող անձ չկա: Քրեական գործով որևէ անձ չի ձերբակալվել:
«Politik.am-ի գործընկերներին կոչ ենք անում զերծ մնալ իրականությանը չհամապատասխանող տեղեկություններ հրապարակելուց»,- ասված է Քննչական կոմիտեի հայտարարության մեջ:
Հիշեցնենք, որ ավելի վաղ կայքը հրապարակում էր արել այն մասին, որ ԱԱԾ նախկին տնօրեն Արթուր Վանեցյանի և ՀՔԾ պետ Սասուն Խաչատրյանի գաղտնալսած անձը ձերբակալվել է․ վերջինս ՌԴ քաղաքացի է, ազգությամբ ռուս։