Վանաձորում վաճառել են հանրային օգտագործման ճանապարհն ու արգելափակել ելումուտը (տեսանյութ)
Վանաձորում միաժամանակ մի քանի սեփական սեկտորներ սպասարկող ընդհանուր օգտագործման ճանապարհը վաճառվել են մեկ սեփականատիրոջ: Բանն այն է, որ սնանկության կառավարիչը լուծարված «Շափյուղա» ՓԲԸ-ն տարածքի հետ մեկտեղ, վաճառել է նաև 5 օբյեկտներ տանող ընդհանուր ճանապարհից մոտ 9 մետր տարածք, ինչը հարևանությամբ գործող արտադրական հիմնարկների սեփականատրերին մոտ մտահոգություն է առաջացրել:
Նրանցից Սեյրան Սուրենյանը 2002-2003 թթվականներին Վանաձորի «Շափյուղա» ՓԲԸ-ից տարածք է ձեռք բերել ու ստեղծել սեփական արտադրական հիմնարկը: Նա փաստաթղթերն է ցույց տալիս` տարածքն ունեցել է ընդհանուր օգտագործման ճանապարհ: սակայն գործարանի լուծարումից հետո, անշարժ գույքի հետ միասին, լուծարման կառավարիչ Սաղաթել Ալեքսանյանը վաճառել է նաև ընդհանուր ճանապարհի մեծ մասը` 12 մ լայնության ճանապարհից թողնելով միայն 2.8 մետրը:
«Դե ահագին է էլի, էլի մնում է իրենց ճանապարհ. 2.8-3 մ քի՞չ ա»,-NEWSPRESS.am-ի հետ զրույցում ասաց սնանկության կառավարիչը` վստահեցնելով, որ առաջնորդվել է պետական կադաստրի կողմից իրականացված չափագրման փաստաթղթերով:
Այն, որ ճանապարհը ընդհանուր օգտագործման է, չի հերքում նաև հարևանությամբ գործող «Տեխնոսարք» ԲԲԸ լուծարման կառավարիչ Արտակ Հարությունյանը: Նա մեզ հետ զրույցում նկատեց, որ նախկին վկայականում ճանապարհն իսկապես ընդհանուր օգտագործման է եղել:
Սեփականատիրոջ որդին` Լևոն Սուրենյանն էլ նկատեց, որ խնդրով դիմել են քաղաքապետարան, սակայն այնտեղից ասել են, որ խնդիրը իրենց գործառույթում չէ, մինչդեռ, եթե խոսքը հանրային օգտագործման տարածքի մասին, ապա քաղաքապետարանը պետք է, մեղմ ասած, տեր կանգներ հարին:
«Եթե ճանապարհը փակեն, ու մեզ իրենց նշած 2.8 մետրը թողնեն, մեր հիմնարկի մուտքը կփակվի ու մեքենաները չեն կարող մոտենալ, մեր գործը կկանգնի: Ու ոչ միայն մերը, էստեղ 5 կառույցներ կան, որոնք օգվում են միևնույն ճանապարհից»,-ասում է Լևոնը:
Նրա հայրն էլ նշում է, որ թեև այս պահին, իրենց չեն արգելում օգտվել ընդհանուր ճանապարհից և ազատ ելումուտ են անում, սակայն ճանապարհը արդեն վաճառված է և ամեն պահի հնարավոր է արգելափակվի:
Այժմ Սուրենյանները խնդրով դիմել են դատարան: Քանի որ ընդհանուր օգտագործման ճանապարհը չէր կարող վաճառվել և պետք է վերադարձվի համայքնին, ուստի ընտանիքը հույս ունի, որ արդարություն կլինի և հարցը հօգուտ իրենց կլուծվի: Հակառակ դեպքում, ոչինչ չի մնում, քան արտագաղթել:
«Դե կամ էլ պետք ա վեռտալյոտ առնեմ, որ կարողանամ վեռտալյոտով գամ, իջնեմ, բայց վեռտալյոտի փող չունեմ»,-կես կատակ-կես լուրջ ասում է Սեյրան Սուրենյանը:
Տեսանյութը` «Երկի Մեդիայի».