Արդյոք միանգամայն նորերը կհրաժարվեն հների սխալներից․ Բաբայան

ԱԺ աշխատակազմի ղեկավարի նախկին տեղակալ Արսեն Բաբայանը ֆեյսբուքի իր էջում գրել է. «Արդյոք միանգամայն նորերը կհրաժարվեն հների սխալներից

Հայաստանի Հանրապետությունը պատմական հնարավորություն ուներ դառնալու տարածաշրջանի ամենաժողովրդավար, ամենաիրավական ու ամենասոցիալական պետությունը: Դրա համար առկա էին բոլոր նախադրյալները: Նոր իշխանություն, որն արմատական որևէ անխզելի կապի մեջ չէր նախորդ բոլոր իշխանությունների հետ: Ուշադրություն դարձրեք, որ խոսքն արմատական և անխզելի կապի մասին է: Նոր ու երիտասարդ կառավարություն, նույնպիսի խորհրդարան: Իհարկե կառավարման ոլորտում երիտասարդ լինելն ունի նաև բազմաթիվ խնդիրներ՝ անփորձությունից մինչև իշխանական կուրացում, սակայն ազնիվ ու ճշգրիտ նպատակի սահմանման դեպքում դրանց հաղթահարումը սոսկ ժամանակի հարց կլիներ:

Առաջնահերթ պետք է դառնար առնվազն տարածաշրջանում լավագույնը և առաջադեմ պետությունը դառնալու խնդրի ազնիվ սահմանումն ու դրան հասնելու գիտակցված, իհարկե շատ դժվար, ճանապարհն անցնելը: Իսկ ի՞նչ տեղի ունեցավ: Ներկայիս քաղաքական իշխանությունը, ինչպես գրեթե բոլոր քաղաքական իշխանություններն են լինում, չդիմացավ մենիշխանության, անձնական բացարձակ ազդեցությունը բոլորի վրա տարածելու հնարավորության գայթակղությանը:

Սոսկ կառավարման առումով գուցե շատ ավելի հեշտ է պետությունը կառավարել հենց այդպես, սակայն փաստ է, որ այդ դեպքում մենք այս անգամ էլ չենք ունենալու այն պետությունը, որը, վստահ եմ, բոլորս երազում ենք մեր հոգու խորքում:

Ցավոք ներկայիս իշխանությունը ոչ միայն զերծ չմնաց պետական իշխանության բոլոր ճյուղերն իր քմահաճույքին վերցնելու գործընթացից, դեռ մի բան էլ լցված է կործանման տանող վրեժով: Ներկայիս իշխանության ամենասարսափելի արարքն այն չէ, որ մարդուն կարող են բացահայտ ապօրինությամբ, առանց անգամ կես հիմքի բանտ ուղարկել, այլ այն, որ հենց այս իշխանությունն է, որ մեր պատմության մեջ մնալու է որպես՝ «նորերը բանտարկում են հներին» նախադեպ ստեղծող իշխանություն, առանց հաշվի առնելու այն պարզ ճշմարտությունը, որ իրենք էլ երբևէ դառնալու են հներ միանգամայն նոր նորերի ձեռքին: Իսկ այդ միանգամայն նոր նորերը կունենա՞ն այնքան ողջամտություն և հանուն Հայաստանի Հանրապետության գործելու կարողություն, որ հրաժարվեն ներկայիս իշխանության ստեղծած նախադեպից: Դժվար է կանխատեսել:

25.10.2019թ․, ՀՀ ԱՆ «Վարդաշեն» ՔԿՀ»: