Մոնթեին վերաբացահայտեցի օպերացիայի նախագծման ժամանակ․ Բաբայան
«Միասնական Հայրենիք» կուսակցության նախագահ Սամվել Բաբայանը ֆեյսբուքի իր էջում գրառում է արել Հայաստանի Ազգային հերոս, Արցախի հերոս Մոնթե Մելքոնյանի մասին, ով այսօր կդառնար 62 տարեկան։ Գրառմանը կից նա հրապարակել է նաև լուսանկար, որտեղ ՀՀ երկրորդ նախագահ Ռոբերտ Քոչարյանն է, Արցախի հերոս Մոնթե Մելքոնյանը, Սամվել Բաբայանը, գեներալ Ժորա Գասպարյանն ու Արցախի նախագահ Բակո Սահակյանը։
Գրառման մեջ մասնավորապես ասվում է.
«1993 թվականին արցախյան գոյապայքարը նոր փուլ էր մտել: Աղդամը, Ստեփանակերտ ներխուժելու ամենավտանգավոր հենակետը լինելուց բացի, ադրբեջանական բանակի կենտրոնական շտաբն էր: Նկատի ունենալով Աղդամի ռազամավարական նշանակությունը՝ Հեյդար Ալիեւը ասել է. «Ղարաբաղի սիրտն ու հոգին է, ադրբեջանական բանակի հույսը»: Աղդամի գրավումը ռազմավարական եւ բարոյահոգեբանական առումներով անհրաժեշտություն էր: Այն կոչված էր ապահովելու Ստեփանակերտի, Ասկերանի եւ հարակից այլ բնակավայրերի անվտանգությունը:
Աղդամի ռազմական հենակետերի վնասազերծման օպերացիան իմ ղեկավարությամբ հաջող սկիզբ, ընթացք եւ ավարտ ունեցավ: Առաջին փուլի ժամանակ խնդիր դրվեց վնասազերծել Աղդամը եզերող կրակակետերը եւ Կենտրոնական ու Մարտունու պաշտպանական (հրամանատար՝ Մոնթե Մելքոնյան) շրջանների աջակցությամբ ելակետային հարձակման համար ստեղծել պաշտպանական ամուր բնագիծ: Օպերացիան իրագործվեց. վերահաստատվեցին նախկին պաշտպանական դիրքերը նաեւ Մոնթեի ճկուն ռազմավարական մտածողության շնորհիվ:
Մոնթեին վերաբացահայտեցի օպերացիայի նախագծման ժամանակ: Նա անհնարինը հնարավոր դարձնելու բնածին տաղանդ եւ ձիրք ուներ, նաեւ՝ զինվորների հետ վարվեցողության աննախադեպ մոտեցում:
Ավոն կենդանի լեգենդ էր, ով մարտի դաշտում հերոսանալուց բացի, պիտի հերոսանար նաեւ պետականաշինության գործընթացում, կայուն զարգացող երկիր կերտելիս: Ավա՜ղ, դարանակալած հակառակորդի փամփուշտը ճակատագրական եղավ:
Նա չապրեց: Նա հավերժացավ:
Հավերժացավ, որ հողը հայրենիք դարձնելու, հայրենիքը սիրելու, հայրենիքով շնչելու դասեր տա ապրողներիս: Հիշատակդ միշտ վառ, Մոնթե´ Մելքոնյան»։