Իշխանությունը փոխվել է, իսկ ձեռագիրը նույնն է
Օրերս, Ազգային ժողովում 2020 թվականի պետական բյուջեն քննարկելիս, վարչապետ Նիկոլ Փաշինյանը «վրդովված» արձագանքեց ընդդիմադիրների կողմից առաջ քաշած այն տեսակետին, թե «բյուջեն հեղափոխական չէ ու հեղափոխություն էլ չի եղել»:
Նա հայտարարեց, թե այդ հարցը «հիմա կլուծի ու արանքից կհանի» ու սկսեց հերթով թվարկել, թե ինչ պետք է լինի հունվարի 1-ից. մինիմալ աշխատավարձը կբարձրանա, ուսուցիչների աշխատավարձը կբարձրանա, բժիշկներինը` կբարձրանա, թոշակները կբարձրանան... էլի մի քանի բան թվարկելով, որոնք հնարավոր է լինեն` Փաշինյանը եզրափակեց.
«Բա հեղափոխությունը պոզով-պոչո՞վ ա լինում»...
Նա վստահ հայտարարեց, որ այլ փոփոխություններ ևս եղել են. «Փոխվել ա մարդու կյանքի փոփոխության մասին պատկերացումը, փիլիսոփայությունը, գաղափարաբանությունը»...
Քանի որ ինքնահռչակ «բարձյալի» գործերն անքննելի են, ուստի չփորձենք մեկնաբանել դրանք, պարզապես նշենք ևս մի քանի սպասվող փոփոխություններ, որոնց մասին չցանկացավ խոսել Փաշինյանը, կամ էլ իբր «չհասցրեց»...
Փաշինյանը չհայտարարեց, որ
1.Կառավարությունը 2020 թ-ի բյուջեում համեմատաբար ցածր տնտեսական աճի ուղենիշ է վերցրել, ու միայն հայտարարություններով է փորձում համոզել, որ ուղենշված թիվը կապ չունի, իրենք ավելի բարձր ցուցանիշ կգրանցեն:
2. 2020 թվականի հունվարի 1-ից երրորդ երկրներից ներմուծվող գրեթե բոլոր ապրանքատեսակների վրա սկսում են տարածվել ԵԱՏՄ մաքսային դրույքաչափերն ամբողջությամբ։ Իսկ դա նշանակում է, որ 699 ապրանքատեսակի մաքսային դրույքաչափերի ավելացման արդյունքում թանկացումներ կլինեն: Կբարձրանան, օրինակ, մսի, ձեթի, հացահատիկի, պարարտանյութի, դեղամիջոցների ու էլի շատ ապրանքների գներ:
3. Եկող տարի կբարձրանա նաև գազի գինը: Ճիշտ է` կառավարությունից արդեն ասել են, որ եթե անգամ հունվարի 1-ից գազի գինը բարձրանա, սպառողը դեռ չի զգա այդ գնային փոփոխությունը, սակայն եթե անգամ սուբսիդավորվի, ապա պետությունը չի պարտավորում ամբողջությամբ իր վրա վերցնել բոլոր սպառողների սուբսիդավորման հարցը, և դա տևական ժամանակ չի լինելու:
4. Եկող տարվանից պետությունը այլևս չի սուբսիդավորելու ջերմամատակարարման և ջրահեռացման համար: Մինչ օրս գործող սակագինն է 191,4 դրամ, որի 11,4 դրամը պետությունը բյուջեից սուբսիդավորում էր: Ճիշտ է, կառավարությունը խոստացել է իջեցնել սակագինը` դարձնելով 180 դրամ, բայց դա դեռ ժամանակի խնդիր է:
5. Կան հարցեր նաև կապված հայկական ատոմային էլեկտրակայանի նորոգման ժամկետների հետ: Կառավարությունում վստահ չեն, բայց կարծում են, որ նորոգման աշխատանքներից էլեկտաէներգիայի սակագինը չի փոխվի, բայց վերջնական չեն խոստանում, որ հոսանքի գինը չի բարձրանա: Այս մասին Հանրային ծառայությունները կարգավորող հանձնաժողովի նախագահ Գարեգին Բաղրամյանն ասել է.
Իհարկե, չհայտարարվեց նաև, որ կշահագործվի Ամուսլարը, որպես հանք, որ Ստամբուլյան կոնվենցիան է վավերացնելու երկիրը, որ հայոց լեզուն ու հայոց եկեղեցու պատմությունը Հայաստանում հետին պլան են մղվում, որ արտագաղթն իրականում ավելի շատ է, քան ներգաղթը, քանի որ մարդիկ ընտանիքներով են արդեն մեկնում, որ նպաստները կրճատվում են ոչ թե նրա համար, որ մարդիկ ավելի լավ են ապրում, այլ որ բյուջեն են տնտեսում` կարիքավոր ընտանիքների հաշվին (օրինակը` զառամյալ թոշակառուների նպաստի կրճատումը), որ.... մի խոսքով, երկար կարելի է թվարկել...
Բարձրացնում են աշխատավարձն ու թոշակը և «բարև, թանկացումներ», ինչպես եղել է բոլոր իշխանությունների օրորք, հրապարակվում են թվեր, իսկ իրականում պատկերն այլ է, հնչում են խոստումներ, որոնց մեկ տոկսոսը նույնիսկ իրականություն չի դառնում... սա սովորական, բոլորին ծանոթ ու բոլորի աչքին սովոր ձեռագիր է` նախկին իշխանության գործելաոճը...
Բայց այս անգամ իշխում է պոպուլիզմը. մարդիկ խոստումներով կերակրվում ու մարսում են իշխանության «քաղցր» սուտը, որովհետև իրավիճակ է փոխվել:
Ու եթե կա փոփոխություն, ապա այդ փոփոխությունը մեկն է` սուտը, կեղծիքը, անօրինությունը մատուցում է թավիշով զմռսված ու արդեն վաղուց մսխված հեղափոխության «զավակը»...