Զառամյալ ու վատառողջ թոշակառուների հետ նախապայմանների լեզվով չեն խոսում, տիկին նախարար
Աշխատանքի և սոցիալական հարցերի նախարար Զարուհի Բաթոյանն արձագանքել է 88 և 93 տարեկան թոշակառու քույրերի մասին հրապարակմանը: Նախարարը ֆեյսբուքյան իր էջում «բացատրել էր», թե ինչու են միասին 60 հազար դրամ թոշակ ստացող քույրերը զրկվել 18 հազար դրամ նպաստից:
Նա, վկայակոչելով օրենքի կետերը, պարզաբանել էր, որ 88-ամյա Վերգինե Ոսկանյանը նպաստ չի ստանում, քանի որ փոխել է փաստացի բնակության վայրը: Այսինքն` նա մեկ ամիս է, ինչ տնակից տեղափոխվել է քրոջ բնակարան` վերջինիս խնամելու համար:
Նախարարուհին նաև «խնդրել է» քույրերի ծանոթ մարդկանց բացատրել և համոզել Վերգինեին հաշվառվել իր տնակում` նպաստ ստանալու համար: Բաթոյանը վստահեցրել է, որ եթե անգամ կինը որոշի բնակություն հաստատել քրոջ տանը, ապա կարող է դուրս գալ տնակի հաշվառումից ու գրանցվել այնտեղ և, միևնույն ժամանակ, նպաստ ստանալ։
Իհարկե, տրամաբանական ու «խելքին մոտ» են հնչում նախարարի խոսքերը, սակայն խնդիրն այն է, որ տարեց կնոջն այդ խոսքերն ամենևին վստահություն չեն ներշնչում: Եվ դա տրամաբանական է. բանն այն է, որ կինը նպաստն ստանում է տնակում ապրելու և միայնակ լինելու համար, ու որքան էլ նրան խոստանան, որ նպաստը նա կշարունակի ստանալ տնակից դուրս գալուց հետո, ակնհայտ է, որ նպաստը չի վերականգնվի:
Այսպես. եթե նախարարության աշխատակիցներն այդքան օրինապահ են, որ միայնակ կնոջը զրկել են նպաստից միայն իր քրոջը հյուընկալվելու համար, ապա տրամաբանական է, որ նույն օրինաչափությամբ էլ բնակարանում բնակվող արդեն ոչ միայնակ քույրերը նպաստ չեն ստանա, քանի որ այս դեպքում նրանց այդ նույն օրենքով նպաստ չի հասնում:
Այս ենթատեքստում չենք կարող չնկատել, որ այստեղ գերիշխում է պետության անմարդկային վերաբերմունքն իր տարեցների նկատմամբ:
Իսկ տրամաբանությունը, թե տատիկը ուզում է օգտվել և' նպաստից, և' տուն ստանալու հնարավորությունից, պարզապես ամոթալի են: Դիցուք, կինը հյուր է գնացել իր քրոջը ժամանակավորապես, ի՞նչ է` հյուր գնալու և տանը չլինելու համար նպա՞ստ են կտրում: Եվ հետո, 88 տարեկան կնոջը ստիպել ապրել ժամկետն անց տնակում, որպեսզի պետությունը նրան 18 000 դրամ տա՞...
Ստացվում է, որ նախկին իշխանությունը բնակարանով չի ապահովել տնակում ապրող կնոջը, իսկ նոր իշխանությունը նրան մատ է թափ տալիս, թե՝ ինչո՞ւ ես տնակից դուրս եկել, ու կտրում է նպաստը...
Այս ֆոնին արդեն նախարարի խոսքերը, թե նպաստը կվերականգնվի, անգամ եթե կինը փոխի իր հաշվառման հասցեն, անկեղծ չեն հնչում: Իսկ եթե դա այդպես չէ, ու նախարարն ազնիվ է իր մտադրություններում, ապա նա զառամյալ, գուցե արդեն իրենց կյանքի մայրամուտին գտնվող վատառողջ կանանց հետ չէր խոսի նախապայմանների լեզվով, այլ անմիջապես կվերականգներ նպաստը՝ առանց որևէ պայմանի...