Եթե Նիկոլ Փաշինյանն այս ապազգային օրակարգի տերն ու հեղինակն է, ուրեմն ինքն էլ պետք է հեռանա․ Արծվիկ Մինասյան
«Եթե Նիկոլ Փաշինյանը հայտարարում է, որ այս ապազգային օրակարգի տերն ու հեղինակն ինքն է, ուրեմն ինքն էլ պետք է հեռանա»։ Այս մասին լրագրողների հետ զրույցում ասաց ՀՅԴ ԳՄ անդամ Արծվիկ Մինասյանը, ով եկել էր միանալու ուսանողների նստացույցին՝ կազմակերպված ԿԳՄՍ նախարար Արայիկ Հարությունյանի դեմ։
Նա նկատեց, որ իրենք դեմ են հասարակությանը սև ու սպիտակի բաժանելու քաղաքականությանը, սակայն, քանի որ հայտնվել են նման իրավիճակում, ապա իշխանությունից պետք է պահանջեն բացատրել, թե որտեղից է գալիս հակազգային պահվածքը և որտեղից է ուղղորդվում իշխանության վարած քաղաքականությունը։
«Նիկոլ Փաշինյանը՝ որպես վարչապետ, չի կարող իրեն վերագրել նախարարության գործառույթները: Օրենքը հստակ սահմանում է, որ Կառավարության անունից ոլորտի քաղաքականությունն իրականացնում է ԿԳՄՍ նախարարությունը: Օրենքով շատ հստակ է ձևակերպված, թե ինչ քաղաքականություն պետք է իրականացվի, այն, ինչ իրականացնում է այս նախարարությունը նախարար Արայիկ Հարությունյանի գլխավորությամբ, հակասում է օրենքին»,- ասաց Արծվիկ Մինասյանը՝ հավելելով, որ Փաշինյանը կամ թյուրիմացության մեջ է, կամ էլ նրան իրավիճակի մասին սխալ են զեկուցել։
Ինչ վերաբերում է դաշնակցական երիտասարդների մասնակցությանն ակցիային, ապա Արծվիկ Մինասյանը նկատում է, որ եթե խնդիրն ազգային է, ապա նորմալ է, որ Դաշնակցության երիտասարդական թևը ևս ակտիվ մասնակցում է։
«Այո, Դաշնակցությունը հանդես է գալիս ազգայինը պաշտպանելու դիրքերից և գտնվելու է այն շարժման կողքին, որը ապազգային երևույթները մեր երկրից դուրս մղելու գործունեություն է իրականացնում»,- հայտարարեց Մինասյանը՝ հավելելով, որ խնդիրը համազգային է։
«Օտարածին օրակարգերը սպասարկելու փոխարեն՝ ժողովրդի բացարձակ մեծամասնությունը ստացած, թեկուզ և էյֆորիայի պայմաններում, ցանկացած իշխանություն պարտավոր է իր ազգային ուղեգիծը պահել, ոչ թե արհեստականորեն համադրել հետադիմությունն ու առաջադիմությունը՝ հետադեմ համարելով այն մարդկանց, որոնք ուզում են իրենց արմատներով զարգացում ունենալ, այլ ոչ թե կտրվել արմատներից և վերածվել կոսմոպոլիտ մի երևույթի, որի նպատակը մեկն է՝ ստամոքսը օր առաջ լցնել»,- ասաց ՀՅԴ ներկայացուցիչը՝ հավելելով, որ սա ոչ թե իշխանության կռիվ է, այլ ազգայինը պահելու, պահպանելու և առաջ մղելու պայքար։