Պողոսը մեջքը ծռած կմնա, կարևորը Նիկոլը լավ ապրի...
Արդեն տևական ժամանակ է, ինչ մամուլն ամեն օր գրում է հարկատուների հաշվից Նիկոլ Փաշինյանի ու նրա ընտանիքի բարեկեցության ապահովման համար ծախսվող միլիոնավոր դրամների մասին։
Նախ դրանց իշխանությունը չի արձագանքում, իսկ երբ հրապարակվում են արդեն փաստական թվեր, իսկ երբեմն էլ գաղտնի որոշումներ, ստիպված է լինում գտնել լղոզված պատասխաններ։
Պարզվում է՝ վարչապետ կարգվելուց և Սերժ Սարգսյանի կառավարական առանձնատնից լայվ մտնելուց հետո, Նիկոլ Փաշինյանը որոշել է, որ կառավարական առանձնատունը հարիր չէ իրեն, այն պետք է թարմացվի ու նորացվի, բերվի պատշաճ տեսքի, որ ինքն ու իր ընտանիքն ապրեն արժանապատիվ կյանքով ու դա նրանց համար կապահովի հարկատուն՝ դրա համար վճարելով սեփական հարկերից, բայց քանի որ Փաշինյանը տիրապետում է բոլոր ձևերին, նա չէր կարող միայն իր առանձնատունը վերանորագել, ուստի ցանկի մեջ մտցրել է ևս 7-ը՝ քննադատության թիրախում չհայտնվելու համար, իսկ ընդհանուր 8 կառավարական առանձնատան վերանորոգման համար Պողոսը կվճարի 2 միլիոն դոլար։
Իսկ քանի որ շարքային Պողոսը համաձայնեց վճարել 2 միլիոն դոլար ու Նիկոլի երեսին չասաց, որ դու այլ բան ասացիր, հիմա անում ես դրա հակառակը, Նիկոլ Փաշինյանը որոշեց շարունակել լծել սեփական ժողովրդին՝ այս անգամ նրանց հաշվին ձեռք բերելով ծառայողական նոր մեքենա՝ 340 հազար դոլար արժողությամբ։
Պողոսը սրա համար նույնպես վճարեց. դարձյալ Նիկոլին չասաց՝ իսկ ո՞ւր են խոստումներդ՝ որ մեզ չես թալանելու, իսկ քանի որ չասաց, հերթը ինքնաթիռինն է։
Պարզվում է՝ 10 տարի մերժված Սերժին օվկիանոսից անդին տեղափոխող ինքնաթիռն այլևս պիտանի չէ, հին է ու շարքից դուրս եկած, ուստի Նիկոլ Փաշինյանին պետք է նոր ինքնաթիռ 50 միլիոն դոլար արժեքով։
Ու ոչինչ, որ այդ 50 միլիոնը շարքային Պողոսը կվճարի իր քրտնամխած աշխատանքով, ինքը կճկռի՝ կարևորը Փաշինյանն իրեն լավ զգա, լավ ապրի:
Այս տեմպերով Պողոսը նաև կվճարի Նիկոլ Փաշինյանի համար զբոսանավ գնելու համար. չէ՞ որ ինքնաթիռից հետո հաջորդ ճոխությունը, որն, անշուշտ, Փաշինյանը կփաթեթավորի որպես հույժ անհրաժեշտություն՝ զբոսանավը կլինի. ու ոչինչ, որ Հաաստանը ծով չունի. ժողովրդի վարչապետը դրա համար ծով կգտնի։
Պողոսը կվճարի:
Պողոսը կվճարի ու ինքը մի ոտատեղ տեղում, ավտոբուսում ու գազելում աշխատանքից ծալված մեջքը նորից կծռի, որ տնից աշխատանքի ու գործատեղից տուն հասնի: Ինքը շատ չի հասկանում, բայց գիտի, որ կարևորն էն է, որ Նիկոլը լավ ապրի:
Պողոսը կվճարի և այս պողոսաշատ երկրում այս շռայլությունների ֆոնին արդեն աննկատ են 2019 թվականի պետական բյուջեում՝ ավելացնելով եկամուտները և ծախսերը 489 մլն 35 հազար 500 դրամով:
Հոգ չէ. Պողոսը կվճարի, քանի դեռ Նիկոլը նրան չի մաշել իր ստերով, պոպուլիզմով, մաղձով, ատելությամբ...