Փաշինյանն ու կինը լուսնից սելֆի կանեն ու ուղիղ եթեր կմտնեն․ Ե՞րբ են վարչապետի համար տիեզերանավ գնելու
Ասում են, թե իշխանությունները մտադիր են Նիկոլ Փաշինյանի համար նոր ինքնաթիռ գնել։ Դե այն ինչ հիմա կա արդեն հին է, մաշված, իսկ մեր «ժողովրդի սիրելի» վարչապետին սազական է ամեն ինչի նորը՝ նոր մեքենա, նորոգված /համարյա նոր էլի/ առանձնատուն, նոր ու զրահապատ ապակիներով աշխատասենյակ, նոր հագուստ, նոր ձեռքի ժամացույց, նույնիսկ՝ նոր այցեքարտ։
Լավ է, որ գոնե դեռ միտք չի դրել նոր տիկին ունենալ, վերջինիս հատուկ՝ «Նոր Ժպիտների քաղաք» ու «Նոր Իմ քայլը» հիմնադրամներով, որոնք նոր կանոններ են սահմանելու հին օլիգարխատի ռեկետի համար։
Իհարկե, թող գնեն, բա էլ ինչու են զոմբիներն ու պողոսները ընտրել նրան ու դարձրել թագավոր։ Բայց կարելի է ոչ թե ինքնաթիռ գնել, այլ միանգամից տիեզերանավ։ Ասենք զանգել Իլոն Մասկին ու ասել՝ «Հարավային Կովկասում ծվարած, ավելի քան մեկ միլիոն աղքատ մարդ ունեցող, յոթ միլիարդ դոլար արտաքին պարտք ունեցող, ահռելի գործազրկություն ունեցող Հայաստանը որոշել է իր վարչապետի համար գնել ձեր արտադրած արբանյակներից։ Մենք մեծահոգի ենք, այդ արբանյակը կարող է լինել սերիական գործարանային արտադրության, բայց լավ կլիներ, եթե անվանական լիներ, հատուկ մեր Նիկոլ թագավորի համար, վրան էլ նրա անունն ու ստորագրությունը դաջած։ Նույնիսկ կարող եք հատուկ կոնցեպտ։ Մենք ժլատ չենք։ Երեք ու կես միլիարդ դոլար պետական բյուջե ունենք, մեր վարչապետին փեշքեշ կանենք, էդ ինչ հարց է»։
Կարծում եմ Իլոն Մասկը կհամաձայնի, երբ լսի երեք ու կես միլիարդ դոլար ճանկելու հնարավորության մասին։ Ու դրանից հետո, կարծում եմ կսկսվի «կինոն»։ Նիկոլ Փաշինյանն ու Աննա Հակոբյանը կնստեն այդ տիեզերանավը, հետները կվերցնեն «Երկրի հակառակ կողմը» ու «յալլա» դեպի բաց տիեզերք։ Նախ կգնան Լուսին, այնտեղ սելֆի կանեն, ուղիղ եթեր կմտնեն ու կողջունեն իրենց նման ճոխ, ուրախ ու բախտավոր կյանք պարգևած զոմբիներին ու մի քիչ էլ պողոսներին։
Պողոսները կիսասոված, բերանի ջրերը հազիվ պահելով «թաթիկով կանեն», իսկ այ զոմբիների մոտ ոգևորությունը կհորդա օվկիանոսի նման ու նրանք կմոռանան, որ գազը թանկանալու է, երեխեքը սոված են, ու էլի նման բաներ։ Հետո Նիկոլն ու Աննան կմեկնեն Մարս ու այսպես բոլոր մոլորակներից հերթով սելֆի կանեն, լայվ կմտնեն, բանաստեղծություն կարտասանեն, նույնիսկ Գալակտիկայից դուրս կգտնեն նախկին ռեժիմի հետքեր, գուցե նաև՝ «դիշովկա հակահեղափոխագաններ» ու նիկոլական «չուչխեն» կփորձեն տարածել ողջ տիեզերքի անսահմանությամբ, հասկանալով, ի վերջո, որ իրենց տիեզերացունց առաքելություն էր վերապահված․․․ թե չէ պողոսիկներ զոմբիստան ու նման խիստ երկրային կատեգորիաներ․․․
Յակոբ Բերգեր