Թովմասյանի դեմ ոչ մի քաղաքական հետապնդման խնդիր չի եղել, Վանեցյանին էլ չեն ձերբակալելու․ԱԱԾ տնօրենի Ժ/Պ (տեսանյութ)
Երբ առաջարկություն կլինի՝ կխոսենք իմ ԱԱԾ պետի պաշտոնն զբաղեցնելու մասին։ Այդ մասին լրագրողների հետ զրույցում ասաց ԱԱԾ տնօրենի պաշտոնակատար Էդուարդ Մարտիրոսյանը։
Անդրադառնալով շրջանառվող լուրին, ըստ որի՝ նյութեր են պատրաստվում ԱԱԾ նախկին տնօրեն Արթուր Վանեցյանի վերաբերյալ և հնարավոր է նա ձերբակալվի, Մարտիրոսյանը նշեց, որ նման բան չկա։
Ինչ վերաբերում է Սահմանադրական դատարանի նախագահ Հրայր Թովմասյանի հետ տեղի ունեցող իրադարձություններին, ապա ԱԱԾ տնօրենի Ժ/Պ-ն հորդորեց ենթատեքստ չփնտրել․ «Քաղաքական հետապնդման խնդիր չի եղել, խնդրում եմ ենթատեսք չփնտրեք»,- ասաց նա։
Իսկ այն, որ Հրայր Թովմասյանի ազգականները՝ մասնավորապես հայրը և դուստրերը, հարցաքննվել են, ըստ Մարտիրոսյանի զուտ նյութերի նախապատրաստման ամբողջականությունն ապահովելու համար է։
«Էդ որ ասում էին շատերը, թե երեխաները 18-20 տարեկան են, ասեմ՝ երեխաները 23-25 տարեկան են, խնդիրը կապված է եղել գույքի հետ՝ իրենց գույք է փոխանցվել, մենք պարտավոր էինք պարզաբանում իրականացնել»,- ասաց նա։
Մարտիրոսյանը նկատեց նաև, որ խոսքը Թովմասյանի ապօրինի հարստացման մասին չէ։
«Մենք հրապարակել ենք, մամուլով մանրամասն ներկայացրել ենք, նույնիսկ նախաքննության շրջանակում չպետք է ներկայացնեինք այն, ինչ ներկայացվել է, ուղղակի նրա համար էր, որ սպառիչ լինի»,- ասաց նա։