«Բարիշեք, մինչև հաջորդ ընտրություններ»․ Արարատի մարզպետը Նորաշենի հարցը լուծում է «տնավարի»

Արարատի մարզի Նորաշեն համայնքի արդեն նախկին գյուղապետ Նորայր Գրիգորյանին ու ժամանակավոր պաշտոնակատար Արտակ Հարությունյանին կանչել են դատախազություն։ Այդ մասին լրագրողների հետ զրույցում ասաց Նորայր Գրիգորյանը։ Նրա դիտարկմամբ` իրենց կանչում են դատախազություն՝ կապված տեղի ունեցած այն անօրինականությունների հետ, որոնց մասին ինքն առավոտյան հայտարարել է բողոքի ակցիայի ժամանակ։

Նորայր Գրիգորյանն անդրադառնալով մարզպետ Գարիկ Սարգսյանի աշխատասենյակում տեղի ունեցած հանդիպմանը` նշեց, որ քննարկել են մի շարք հարցեր, որոնց շուրջ դեռևս վերջնական համաձայնության չեն եկել՝ միայն բանավոր քննարկումներ են։ 

«Մի քանի խնդիր է քննարկվել. օրինակ` առաջարկվել է, որ համայնքի ղեկավարի պաշտոնակատար նշանակվի ուրիշ անձ, մինչև ընտրություններ, կամ ասում են՝ բարիշեք, մինչև հաջորդ տարվա ընտրություններ, այս ընթացքում և ավագանին չցրվի, մնա, և համայնքի ղեկավարը, միասին գնաք: Կամ մարզպետարանից կամ այլ տեղից լրիվ չեզոք մարդ նշանակվի»,- ասաց Գրիգորյանը:

Ինչ վերաբերում է «ծիրանի ծառի տակ» տեղի ունեցած «ավագանու նիստին», ապա Նորայր Գրիգորյանը պնդում է, որ այդ հանդիպման ընթացքում անօրինական արձանագրություն է կազմվել։

«Ես դա լսել եմ մի քանի օր հետո․ եթե դա ավագանու նիստ է եղել, ինչո՞ւ ինձ չեն ուղարկել արձանագրությունը: Ինչո՞ւ է մարզպետը դա թաքցնում: Եթե նիստ են անում, պարտավոր են մի օրինակ ուղարկելու համայնքի ղեկավարին: Համայնքի ղեկավարը պետք է ստորագրի ու կնքի: Ի՞նչ նիստ, եթե իմ ստորագրությունը չկա, կնիքը չկա»: