Ոռոգման ջուրը փակել են, բերքը չորանում է. Գետաշենի բնակիչները կառավարության դիմաց բողոքի ակցիա են իրականացնում (տեսանյութ)

Արմավիրի մարզի Գետաշեն համայնքի բնակիչները բողոքի ակցիա են կազմակերպել կառավարության դիմաց: Նրանք պահանջում են ժամանակին տեղ հասցնել ոռոգման ջուրը, որպեսզի բերքը չչորանա:

«72 հա տարածքում բանջարաբոստանային կուլտուրա ենք մշակում, մթերող գործարանի հետ 300 մլն դրամի պայմանագիր են կնքել, էս վերջին մեկ ամսվա ընթացքում կանգնել ենք փաստի առաջ: Առաջ գոնե էլի ընդհատումներով, բայց ջուրը գալիս էր, հիմա փաստի առաջ ենք կանգնել»,-լրագրողների հետ զրույցում իր դժգոհությունը հայտնեց գյուղացիներից Սամվելը:

Նրանք նկատում են, որ ամեն տարի մշակում են արժեք ունեցող բանջարաբոստանային կուլտուրաներ ու վաճառում են գործարաններին։ Այս տարի 300 մլն դրամի պայմանագիր ունեն կնքած, որից 58 մլն դրամը կանխավճար են ստացել։

«Ամսի 15-ից արդեն ջուրը փակել են»,- ասում են գյուղացիներն ու նշում, որ դիմել են մարզպետարան, սակայն այնտեղից ասել են, որ վնասի չափը չեն կարող հաշվարկել։ 

Իմանալով, որ գյուղացիները բողոքի ակցիա են անում, կառավարության մոտ էին եկել նաև Ջրային կոմիտեի ներկայացուցիչները:

Նրանք իրենց հետ նկարներ էին բերել ու լրագրողներին էին ցույց տալիս: «Տեսեք, որ ջուր եղել է, հողը թաց է»,- ասացին նրանք, ինչին գյուղացիները հակադարձեցին: «20 օր ա՝ ջուր չկա, երեկ մի քանի ժամով բացեցիք, իրար գլուխ էինք ջարդում, որ ջրենք, էն էլ չհասցրեցինք»:

Մանրամասները՝ տեսանյութում