Նիկոլ Փաշինյանը լուծել է «Հայաստանի թիվ մեկ խնդիրը», մնացել է երկրորդը՝ նիհարելը

Այսօր սեպտեմբերի 21-ն է՝ Հայաստանի անկախության 28-րդ տարեդարձը, թվում է՝ Հայաստանի բազմադարյա պատմության կարևորագույն օրերից մեկը... 

Տոնի առթիվ Հայաստանի և Արցախի բարձրագույն ղեկավարությունն այցելել է Եռաբլուր: Ասել է թե՝ կողքի-կողքի են հավաքվել Հայաստանի նախագահը, վարչապետը, ԱԺ նախագահը, ինչպես նաև Արցախի նախագահը: 

Թվում էր՝ սույն պարոններն այսօր պետք է Եռաբլուրում հանգչող հերոսներին հիշեին, կիսվեին նրանց մասին պատմություններով, բացի այդ էլ շատ հարցեր, շատ խնդիրներ քննարկեին, Անկախության մասին միմյանց պատկերացումներով կիսվեին, Հայաստանի անկախության ամրապնդմանն ուղղված քայլերը քննարկեին, հազար ու մի մարտահրավերներին անդրադառնային, որոնք պարզապես չոքել են Փաշինյանի իշխանության դռանը, փոխարենը ՀՀ նախագահն ու վարչապետը ծաղիկները ձեռքին, դեմքի ամենալուրջ արտահայտությամբ, մտածելով, թե իրենց խոսքը տեսախցիկներին չի հասնում. քննարկում են իրենց ստամոքսն ուղարկածն ու չուղարկածը:

Մեծ հաշվով, ո՞ւմ է պետք նման ձևով հիշատակ հարգելը: Երկու բարձրաստիճան ղեկավարներն իրենց այս հարցուպատասխանով նմանվում են ապրիլի 24-ին Ծիծեռնակաբերդի հուշահամալիր բարձրանալիս արևածաղիկ կեղևազրկող երիտասարդներին: Նման պահվածքը մեկ այլ բացատրություն էլ կարող է ունենալ. վարչապետը վերջնականապես հրաժարվում է նախագահին հաշվի առնելուց ու նրա հետ որևէ հարց քննարկելուց և նրանց խոսակցության միակ թեման մնում է ուտելն ու չուտելը: 

Իսկ թե ինչի մասին կարող են զրուցել և նույնիսկ պարտադիր է, որ զրուցեն ՀՀ նախագահն ու վարչապետը, համառոտ հուշումներ. 

Անկախություն

Անկախությունից, կարծում ենք, նույնիսկ կարիք չկա բացատրելու, թե ինչու է պետք առնվազն այս օրը խոսել, քննարկել, արժևորել. սա աշխարհաքաղաքական նշանակության հարց է. պահպանումը շատ խելք ու ճկունություն է պահանջում, կորուստը ջախջախիչ հարված կլինի:

Ամուլսար

Վայոց ձորի մարզի Ջերմուկ քաղաքում դասադուլներ, գործադուլներ են, վարչապետի կոչը՝ ապաշրջափակման մասին, արդյունք չեն տալիս: հանքը, ավելի շուտ, մոտ է շահագործմանը, հետևանքները ծանր են լինելու և՛ բնակչության, և՛ անձամբ Փաշինյանի համար: Ցույցեր բռնի ուժով ցրելու մեծ փորձ Փաշինյանը, առավել ևս նրա՝ նորանշանակ ոստիկանապետը, չունեն: Էլ չենք ասում՝ մարդկանց առողջությանը հասցվելիք հավանական վնասի մասին: Իսկ Փաշինյանը խոսում է ուտելուց-չուտելուց ու նիհարելուց...  

ԱԱԾ պետի հայտարարություն

Հայաստանի ազգային անվտանգության պետն ազատման դիմում է գրում՝ կոչ անելով երկրի վարչապետին՝ կանգ առնել ու սթափվել: ԱԱԾ պետը վարչապետի թիմում գրեթե միակն էր, ում գործունեության շնորհիվ Փաշինյանը 1.5 տարի թոզ փչեց իսկական հեղափոխության հույսով փողոց դուրս եկած ու իրեն հետևած քաղաքացիների աչքին: Վանեցյանը, հենց իշխանության իրականացրած հարցումներով, ամենաարդյունավետն էր աշխատում, նրա ռեյտինգն ամենաբարձրն էր: Վարչապետին կանգ առնելու կոչ է անում մեկը, ով ամենամանրակրկիտն է տեղեկացված երկրի սպառնալիքներին, ազգային անվտանգությանը սպառնացող երևույթներին, և այդ տեղեկացված մարդն իր վերադասին գրեթե բաց տեքստով ասում է, որ նա առաջնայինը երկրորդականից չի տարբերում: ԱԱԾ ղեկավարն անդունդի եզրին կանգնած վարչապետին գոչում է՝ կանգ առ, իսկ Փաշինյանը խոսում է ուտելուց-չուտելուց ու նիհարելուց...  

Բակո Սահակյանի հարցաքննությունը

Արցախի նախագահը հրավիրվում է հարցաքննության Մարտի 1-ի գործով: Գործադիրի ղեկավարության դուդուկի տարկ պարող ՀՔԾ-ն ծանուցումով հարցաքննության է հրավիրել Բակո Սահակյանին: Ասել է թե՝ շատ բարձրից այստեղ՝ Հայաստանում, թքած են ունեցել միջպետական հարաբերությունների այն չափանիշների վրա, որով սահմանվում է, որ անկախ եղբայրական պետության՝ Արցախի հանրապետության ղեկավարին այլ անկախ պետության որևէ մարմին չի կարող հարցաքննել: Իսկ Փաշինյանը խոսում է ուտելուց-չուտելուց ու նիհարելուց...  

Իսկ նախագահի մասին ընդհանրապես չենք խոսում. հեղափոխության օրերին հաշտարարի «դիմակը դեմքին» Սարգսյանը սկսել է նմանվել նախկին ԱԳՆ նախարարին, երբ ամենակարևոր պահերին «մկան ծակին հազար թուման էր տալիս»: 

Էլի շատ ու շատ թեմաներ կարող ենք հուշել սույն պարոններին, որ քննարկեն իրար տեսնելիս կամ զանգելիս:

Փաշինյանը Միացյալ Նահանգներ է մեկնում, ԱՄՆ-ի հետ հարաբերություններն առանձնապես ոգևորող չեն, իսկ Փաշինյանը խոսում է ուտել-չուտելուց ու նիհարելուց...

Փոխվարչապետ Մհեր Գրիգորյանը վստահեցնում է, որ Պուտինը Հայաստան է գալիս, իսկ Փաշինյանի հետ կհանդիպի, թե ոչ, միայն ենթադրությունների մակարդակում են, Հայաստան գալն ու վարչապետին չհանդիպելն ինքնին խնդիր են, իսկ Փաշինյանը խոսում է ուտել-չուտելուց ու նիհարելուց...  

Հայաստանում ու Արցախում աննախադեպ մասշտաբի զորահավաք է անցկացվելու, երկու երկրի սահմանների պաշտպանությունը գերնպատակ է: Մեր հարևան ու ոչ բարեկամ երկրի Պնախարարը պատրաստականություն է հայտնում մարտի դաշտում Արցախի հարցը որոշելը, իսկ Փաշինյանը խոսում է ուտել-չուտելուց ու նիհարելուց...  

Գազի գինը սպառնում է բարձրանալ, իսկ Փաշինյանը խոսում է ուտել-չուտելուց ու նիհարելուց...  

Ջերմուկում լարված իրավիճակ է, Փաշինյանի կադր մարզպետը թաթախված է «տղայական բազարների» մեջ, իսկ Փաշինյանը խոսում է ուտել-չուտելուց ու նիհարելուց... 

Բայց կարևորը...

Նիկոլ Փաշինյանը լուծել է «Հայաստանի թիվ մեկ խնդիրը», խնդիրը, ում «զոռին տալով», պահում է ճաղերի ետևում, և ուրեմն հանգիստ կարելի է խոսել ուտել-չուտելուց ու նիհարելուց...  

NEWSPRESS.am