«Բանանց» – «Ուլիս» պատասխան մրցավեճը կկայանա այսօր

Հայաստանի Գավաթի խաղարկության քառորդ եզրափակչում այսօր` նոյմբերի 25-ին կկայանա «Բանանց» – «Ուլիս» պատասխան մրցավեճը:

Այս զույգը միակն է, որում ակնհայտ ֆավորիտ կար, և որում առաջին խաղում ամենախոշոր հաշիվն է գրանցվել: «Բանանցը» հյուրնկալվելիս հաղթել է 3:0 հաշվով:

Նոյմբերի 21-ին այս թիմերը մրցեցին առաջնության 14-րդ տւրի շրջանակում: Այդ խաղից առաջ խառնաշփոթ իրավիճակ էր ստեղծվել հյուրերի կողմից հանդիպման մեկնարկին չհասցնելու պատճառով: Տեսուչը ստիպված որոշեց խաղը 30 րոպեով հետաձգել, որպեսզի հյուրերը կարողնանա նախավարժանք անցկացնել:

Առաջնության խաղում ուլիսցիները մեկ խաղակես կարողացան հավասար պայքար մղել «Բանանցի» դեմ, բայց երկրորդ կեսում, միևնույնն է, խոշոր պարտություն կրեցին:

Ինչ վերաբերում է «Բանանցին», ապա այդ թիմի ֆուտբոլիստների համար սա շատ լավ առիթ է թիմի նոր գլխավոր մարզիչ Տիտո Ռամալյոյին համոզելու, որ նրանք արժանի են երևանյան թիմում մնալուն: Իսպանացին շաբաթօրյա խաղից հետո հայտարարել էր, որ կողմնորոշվել է, թե ում է պահելու թիմում, բայց այդ ցուցակում չհայտնված խաղացողները առաջիկա խաղերում կարող են մտափոխել նրան: