Ոչխարները մեր դաշտերի խոտը ուտելու են և մեծ վնաս են պատճառելո՞ւ. Փաշինյանը` ոչխարաբուծության մասին (տեսանյութ)

Այս տարի զգալիորեն աճել է ոչխարի և ոչխարի մսի արտահանումը, իսկ գինը մոտ 50 տոկոսով աճել է. անցած տարի այն եղել է 74 դոլար, իսկ այս տարվա կեսին կազմել է 101 դոլար: Այս մասին այսօր՝ սեպտեմբերի 19-ի կառավարության նիստում, ասաց էկոնոմիկայի փոխնախարար Ավագ Ավանեսյանը` խոսելով ոչխարաբուծության ծրագրի պետական աջակցության մասին:

Ըստ փոխնախարարի՝ ծրագրի արդյունքում 2019-2023 թվականներին, պետական աջակցությամբ, ոչխարաբուծությամբ զբաղվող տնտեսավարողներին հնարավորություն կընձեռվի մատչելի պայմաններով ներկրել շուրջ 30 հազար գլուխ տարբեր սեռահասակային խմբերի մանր եղջերավոր կենդանիներ:

Շրջակա միջավայրի նախարար Էրիկ Գրիգորյանը նկատեց, որ եթե սա ռազմավարական ծրագիր է, ապա պետք է նաև քննարկել, թե ինչ բնապահպանական խնդիրներ կարող են առաջ գալ, քանի որ ծրագիրը ռիսկային է:

Վարչապետ Նիկոլ Փաշինյանը ծիծաղելով արձագանքեց. «Այսինքն ի՞նչ ռիսկեր կան, կարող ա ոչխարը մեր խոտն ուտի ու վնաս տա՞»:

Էրիկ Գրիգորյանը պատասխանեց, որ իրականում նման ռիսկ կա և հնարավոր է ոչխարաբուծության ծավալի ավելացումը տանել անապատացման և դեգրադացման:

Փաշինյանը դարձյալ կատակով արձագանքեց. «Պարզվում է՝ էլի պետք է ՇՄԱԳ անե՞նք, որովհետև կարող է պարզվել, որ մեծ ռիսկ կա՞, որ ներկրված ոչխարները մեր դաշտերի խոտը ուտելու են և շրջակա միջավայրին մեծ վնաս են պատճառելու»:

Մանրամասները` տեսանյութում