ԵՀՄՖ նախագահ դոկտոր Աշոտ Գրիգորյանի այցը Մեծ Բրիտանիայի խորհրդարանի Լորդերի պալատ

Ս/թ սեպտեմբերի 9-ին, ԵՀՄՖ նախագահ և PANAP-ի («Քաղաքական և տնտեսական վերլուծության ու կանխատեսման պան-եվրոպական կենտրոն») համանախագահ դոկտոր Աշոտ Գրիգորյանը պաշտոնական հանդիպում ունեցավ Մեծ Բրիտանիայի Լորդերի պալատում Նեթի Մեծարգո Լորդ Փիթեր Հեյնի (The Right Honourable Lord Peter Hain of Neath) հետ։

Հանդիպմանը մասնակցում էր նաև հայտնի քաղաքագետ, The Guardian թերթի անվանի լրագրող Ջոնաթան Սթիլը։ Վերջինս և Լորդ Հեյնը հինգ տարի ի վեր համագործակցում են PANAP-ի հետ՝ հանդիսանալով խորհրդի կազմի անդամ։
Քննարկման հիմնական թեման Լոնդոն-Բրյուսել-Մոսկվա համագործակցության խնդիրներն էին, որը համարվում է PANAP-ի հիմնական գործունեության առանցքը։ Դոկտոր Գրիգորյանը ներկայացրեց էներգետիկ ոլորտում Եվրոմիություն-Ռուսաստան հարաբերությունների զարգացման վերաբերյալ մանրամասներ՝ առանձնահատուկ ընդգծելով Մեծ Բրիտանիայի հետ կապված խնդիրները։ Մասնակիորեն՝ նշվեց, որ Մեծ Բրիտանիայի շահը գազային պատերազմում, որը հովանավորվում է ԱՄՆ-ի կողմից, համընկնում է Գերմանիայի և Եվրոմիության հետաքրքրությունների հետ, այն է՝ առավելագույնս օգտվել ռուսական գազից։ Գրիգորյանը ներկայացրեց տվյալներ առ այն, որ ըստ ամերիկյան ծրագրերի՝ ԱՄՆ-ի էքսպանսիայի արդյունքում Գերմանիայի և Մեծ Բրիտանիայի տնտեսությունները 30%-ով անկում են ապրելու գազի գնագոյացման նույնաչափ թանկացման հետևանքով: Նշենք, որ սա PANAP-ի փորձագետների ներկայացրած խիստ պատասխանատու տվյալներն են։

Հանդիպման ընթացքում ԵՀՄՖ նախագահը անդրադարձ կատարեց նաև Հայաստանում Ամուլսարի խնդրին և ներկայացրեց դրա շուրջ առկա մանրամասները։ Լորդ Հեյնը խիստ զարմանքով ընկալեց այս հարցում Բրիտանիայի արքայական ընտանիքի և մասնավորապես՝ արքայազն Չարլզի մասնակցության փաստը՝ հատկապես տեղեկանալով այդ կապի շուրջ ՀՀ նախագահ, ԱՄՆ նախկին դեսպան Արմեն Սարգսյանի մասնակցության մասին։ Գրիգորյանը հայտարարեց, որ տնտեսական լուրջ խնդիրներ ունեցող և չափազանց աղքատիկ բյուջեի տիրապետող Հայաստանը չի կարող իր երկրին էկոլոգիական աղետ պատճառելու հեռանկարի ֆոնի վրա հարստացնել առանց այդ էլ չափազանց մեծահարուստ մի շարք ընտանիքների, որոնք հանդիսանում են «Լիդիան ինթերնեյշնլ» օֆշորային կազմակերպության անդամներ։ Կողմերը պայմանավորվեցին, որ պրն․ Հեյնը կխորհրդակցի Մեծ Բրիտանիայում հզոր ընդդմիություն հանդիսացող Լեյբորիստական կուսակցության և Լորդերի պալատի համապատասխան անդամների հետ, որոնք կշարունակեն պրն․ Գրիգորյանի հետ համագործակցությունը փորձագիտական մակարդակներում, մասնավորապես՝ էներգետիկայի և հանքաարդյունաբերության ոլորտներում։ Պայմանավորվածություն ձեռք բերվեց, որ հարցը կներկայացվի նաև Լեյբորիստական կուսակցության նախագահ Ջերեմի Քորբինին։ Լորդ Փիթեր Հեյնը խոստացավ, չնայած Մեծ Բրիտանիայի այս դժվարագույն՝ «բրեքսիթի» ժամանակահատվածում (braxit - Միացյալ Թագավորության հեռացումը Եվրոպական Միությունից) առաջացած ծանրագույն խնդիրներին՝ համապատասխան կարևորագույն պաշտոնյաների ուշադրությունը հրավիրել PANAP-ի կողմից բարձրացված հարցերի վրա։

Կողմերը պայմանավորվածություն ձեռք բերեցին PANAP-ի ամենամյա դեկտեմբերյան հավաքին Լորդ Հեյնի և Ջոնաթան Սթիլի մասնակցության շուրջ։