Ամուլսարը Փաշինյանի «կարապի երգը» կարող է դառնալ

Հայաստանի գործող վարչապետ Նիկոլ Փաշինյանը, իր երեկվա ֆեյսբուքյան ուղիղ եթերում, խոսելով Ամուլսարի խնդրի մասին, ըստ էության, բացահայտեց իր վախերը, որոնք կապված են այդ բարդ խնդրի հետ։ Փաշինյանի խոսքը, ըստ էության պտտվում էր հետևյալ առանցքի շուրջ՝ Ամուլսարի հանքի շահագործումն արգելելու համար իրավական հիմքեր չկան, ինչը նշանակում է, որ հանքի շահագործումը պետք է թույլատրվի ու դեպի Ամուլսար ճանապարհների բլոկադան պետք է վերացվի։

Սակայն միևնույն ժամանակ Փաշինյանը փորձում է համոզել բոլոր նրանց, ովքեր դեմ են հանքի շահագործմանը, տարատեսակ վարկածների ու ենթադրությունների սարդոստայն փաթաթելով նրանց վզներին։ Թեև իր խոսքում Փաշինյանը նշեց, որ չի կարող բացահայտ ու պարզ խոսել, սակայն նույնիսկ անհրաժեշտ կոնֆիդենցիալությունը պահելով հանդերձ, որոշ նրբերանգներ այդ «գործի» հետ կապված, այնուամենայնիվ «սլիվ» արեց։

Մասնավորապես, պարզ դարձավ, որ բավական խիստ խոսակցություն է եղել օրեր առաջ միջազգային «Լիդիան» ընկերության ղեկավարի ու Փաշինյանի միջև։ Պարզ դարձավ նաև, որ միջազգային ընկերությունը պատրաստվում է գնալ միջազգային արբիտրաժային ատյան, ինչի հետ կապված հետևանքները կլինեն չափազանց ծանր, այն աստիճան, որ վարչապետի իսկ խոսքով, շատ լծակներ որոնք այժմ դեռ իշխանության ձեռքին են, պարզապես անցնելու են արդեն արբիտրաժին ու արբիտրաժի որոշման դեմ կառավարությունն այևս ասելիք կամ անելիք չի ունենալու։

Կարելի է նաև հասկանալ, որ միջազգային ընկերությունը նույնիսկ ժամկետների մասին է խոսել, ինչը նշանակում է, որ «Ամուլսար» նախագծում ներքաշված բաժնետերերը, որոնք այնքան էլ փոքր մարդիկ չեն համաշխարհային բիզնես շրջանակներում, մեղմ ասած՝ ժամանակ են տվել Փաշինյանին։ Հակառակ պարագան, հասկանում է նաև Փաշինյանը՝ հերթական հեղափոխությունը կարող է լինել Հայաստանում, որը կարող է մեղմ ասած՝ «ավլել տանել» հենց իրեն ու իր իշխանությունը՝ այսպես ասած՝ «թավշյա հեղափոխության» մասին պնդումներով հանդերձ, որոնց աշխարհը ի սկզբանե իսկ վերաբերվեց սկեպտիկորեն։

Մամուլում շրջանառվեցին լուրեր, որ նույնիսկ համայնքային ոստիկաններին են սկսել ցույց ցրել սովորեցնել, ինչը նշանակում է, որ Փաշինյանը պարզապես այս ուղիղ եթերով փորձեց դեռ «խաթրով» հարցը լուծել, իսկ ապագայում ամենևին չի բացառվում, որ դիմի «ուժի»։

NEWSPRESS.am