«Ժողովուրդը». Կրթության նախարարության նորարարությունը՝ շիլաշփոթ

«Ժողովուրդը» գրում է.

«Առաջին դասարանցիների առցանց հերթագրման գործընթացը մեծ դժգոհություն է առաջացրել մի շարք ծնողների մոտ. լուծում, սակայն, այդպես էլ չի գտնվում:

Հիշեցնենք, որ ՀՀ կրթության, գիտության, մշակույթի և սպորտի նախարար Արայիկ Հարությունյանը դեռևս անցյալ տարի հայտարարել էր, որ, 2019-ից սկսած, առաջին դասարանցիների ընդունելությունը կլինի առցանց, բոլորի համար կստեղծվեն հավասար հնարավորություններ, և արտոնյալ դպրոցներ ու ծնողներ չեն լինի, իսպառ կվերացվի մարդկային գործոնը:

Եվ մինչ ծրագիրը գործարկելը նախարարությունը վստահեցնում էր, որ առավելություն կտրվի այն ծնողներին, որոնք ունեն դպրոցում սովորող երեխա և ցանկանում են, որ մյուս երեխան ևս նույն դպրոց հաճախի: Ինչ խոսք, լավ մտահղացում է: Բայց պարզվում է, որ այսօր՝ սեպտեմբերի 1-ից մեկ օր առաջ, մի շարք երեխաներ չեն կարող դպրոց հաճախել հատկապես փոքր Կենտրոնում: Բանն այն է, որ առցանց գրանցման ծրագիրը խափանված է եղել և անգամ գրանցման հայտարարությունից 3 օր անց տեղերը փակել է՝ անհնար դարձնելով գրանցումը:

Ու մարդիկ կան, որոնք ունեն մեկ երեխա, որ սովորում է, օրինակ, Չեխովի կամ Չարենցի անվան դպրոցներում, երկրորդ երեխային չեն կարողացել գրանցել նույն դպրոցում ու ստիպված են տանել նախարարության առաջարկած հեռավոր՝ օրինակ, Փարաքարի, Ավանի դպրոցներից մեկը: Ստացվում է, որ ծնողը պետք է առավոտյան արթնանա, մի երեխային տանի Կենտրոնի դպրոց, մյուսին՝ Փարաքար, հետո վերադառնա աշխատանքի՝ առանց ուշանալու:

Համաձայնեք, մեղմ ասած, դժվար է, էլ չասած, որ երեխաները կապված են իրենց քույրերի և եղբայրների հետ, և դժվար է նրանց բաժանել:

Երբ «Ժողովուրդ» օրաթերթի ստացած դժգոհությունները փոխանցեցինք ԿԳՄՍ նախարարի մամուլի խոսնակ Անժելա Կժդրյանին, նա ասաց. «Հայտագրվելու միակ սկզբունքն այն է, որ ուղղակի պետք է ծնողները հասցնեին շուտ մտնել և շուտ գրանցել իրենց երեխային: Իսկ դպրոցներն էլ իրենց հերթին չեն կարող աշակերտներ ընդունել, որովհետև նրանց լիցենզիաները տրամադրվում են որոշակի պայմաններ հաշվի առնելով»:

Իսկ ի՞նչ անեն այն ծնողները, որոնց մի երեխան արդեն սովորում է, իսկ մյուսին չեն կարողացել գրանցել նույն դպրոցում (համակարգի խափանման կամ չհասցնելու պատճառով): Այս հարցին ի պատասխան՝ խոսնակն ասաց. «Իրականում ի սկզբանե մենք մտածում էինք արտոնություն տալ այդ ծնողներին, բայց հաշվի առնելով օրենսդրական դաշտը, իրավական կարգավորումները՝ դա հնարավոր չե­ղավ, որովհետև բոլորը հավասար իրավունք ունեն: Պետք էր ուղղակի ավելի շուտ երեխային գրանցել»:

Այսպիսով. Կրթության նախարարությունը մի նորարարություն է արել, որը վերածվել է շիլաշփոթի, որից անգամ իրենք գլուխ չեն հանում: Բայց այս գործողությունների թիկունքում ճակատագրեր են, որոնք, կարծես թե, առանձնապես չեն հետաքրքրում պատկան մարմիններին»:

Մանրամասները՝ թերթի այսօրվա համարում: