Ինչո՞ւ գնահատական չի տրվում Լևոն Տեր-Պետրոսյանի կողմից 1996թ-ի ցույցերին ԶՈւ-ի կիրառման վերաբերյալ ևս. Հայկ Ալումյան

Քաղաքացիների դեմ զինուժի կիրառման պրակտիկան ոչ միայն միջազգային և Հայաստանում է եղել մինչև Մարտի մեկի դեպքերը: Այս մասին լրագրողների հետ հանդիպման ժամանակ հայտարարեց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը: Նա մեծ էկրանին ցուցադրեց և ներկայացրեց, որ զինուժի կիրառման դեպքեր եղել են Չինաստանում, Նեպալում, ՀԱՀ-ում, Հնդկաստանում, Բրազիլիայում, Մեծ Բրիտանիայում և ԱՄՆ-ում:

Սակայն, որ ուշագրավ է, նա օրինակներ բերեց Լևոն Տեր-Պետրոսյանի կողմից 1996թ-ի ցույցերի ընթացքում ԶՈւ-ի կիրառման մասին:

Ալումյանը հիշեցրեց, որ 1996թ-ի հոկտեմբերի 2-ին ՀՀ բանակը մտավ մայրաքաղաք՝ պաշտպանելու նախագահական նստավայրը։

Ալումյանը շեշտեց, որ եթե 2008թ-ին հայտարարվել էր արտակարգ դրություն, ապա 1996թ-ին ԶՈւ կիրառվել է առանց արտակարգ դրություն հայտարարելու։

«Եթե մեր քննչական մարմինները, Դատախազությունը սևեռվել են այն գաղափարի, ընդ որում՝ կեղծ գաղափարի վրա, որ զորքը չի կարող օգտագործվել ներքին նպատակներով, ապա ինչո՞ւ այս ամենին գնահատական չի տրվում»,- ասաց փաստաբանը:

Նա նկատեց, որ ՀՀ Սահմանադրությունը չի արգելում ԶՈւ կիրառել զանգվածային անկարգությունները կանխելու համար:

«Սա միֆ է, և այսօր Ռոբերտ Քոչարյանի դեմ հարուցված քրեական գործի մեծ մասը հիմնված է այդ միֆի վրա։ Իրականում մեր Սահմանադրությունը թույլ է տալիս կիրառել ԶՈւ` հնարավոր բացասական հետևանքները կանխելու համար»,- ասաց Ալումյանը` ընթերցելով ՀՀ Սահմանադրության 8.2 հոդվածը. «ՀՀ ԶՈւ ապահովում են ՀՀ պաշտպանությունը, անվտանգությունը, տարածքային ամբողջությունը, նրա սահմանների անձեռնմխելիությունը»։

Փաստաբանը չմոռացավ վկայակոչել նաև ՀՀ ԶՈւ ներքին կանոնակարգը, ըստ որի զինծառայությունները կարող են մասնակցել այնպիսի գործողությունների, որոնք դատարանի կողմից ճանաչվել են հասարակության ու պետության շահերից բխող. ԶՈւ կարող են կիրառվել նաև զինված անձի կամ անձանց դեմ, եթե այլ կերպ նրանց հնարավոր չէ վնասազերծել։