Ստեփանավանից շտապել են օգնության հասնել Մարությանին

Երևան քաղաքն աղբի մեջ թաղած ու գունագեղ ծաղիկներից զրկած Երևանի ղեկավար Հայկ Մարությանն ամեն պատեհ ու անպատեհ առիթի շտապում է իր ու իր թիմի անգործությունը ծածկել «Սանիթեք»-ի, այդ ընկերության և քաղաքապետարանի՝ մինչ օրս հանրությանն անհայտ կետերով պայմանագրի վրա:

Այս անպատասխանատվության արդյունքում տուժում ենք երևանցիներս՝ ամեն 100 մետրի վրա աղբի գարշահոտություն շնչելով ու արտաշնչելով:

Իհարկե, Երևանի քաղաքապետը՝ Կարգին Հայկոն,մի պահ որոշեց իրավիճակը շտկել ու հարկատուներիս տված գումարներով աղբահանող մեքենաներ առնել մասնավոր ընկերության համար, սակայն Մարությանն իր հաշվարկներում սխալվեց. նոր գնած ու «Սանիթեք»-ին նվիրած մեքենաներն իրավիճակը չփրկեցին:

Սակայն պարզվում է, որ սա հերիք չէ, և մեկ էլ Ստեփանավանից են Երևանին օգնության հասել:

Պարզվում է՝ Ստեփանավանից Երևան աղբ հավաքող մեքենա են բերել: Այս խայտառակությունը կոծկելու փոխարեն Երևանի քաղաքապետարանը հպարտորեն հրապարակել է այդ մասին տեղեկատվությունն ու մի հատ էլ շնորհակալություն հայտնել Ստեփանավանի քաղաքապետարանին՝ գետինը մտնելու փոխարեն:

Ու չգիտես լաս, թե խնդաս այս քաղաքային իշխանության կառավարման 0 հմտությունների ու անճարակության վրա:

Գուցե մի հատ էլ Ստեփանավանից օգնության կանչեք խոտ հնձողների՞, որ գան Երևանի կանաչ տարածքներում խոտերը հնձեն, որ այսքան շատ հրդեհների պատճառ չդառնան:

Ի դեպ՝ այն, որ անցյալ տարվա համեմատ այս տարվա վեց ամիսներին հրդեհներն աննախադեպ թվով աճել են՝ այսօր հրավիրված մամուլի ասուլիսի ժամանակ փաստեց նաև ՀՀ ԱԻՆ հրդեհային և տեխնիկական անվտանգության հետաքննության վարչության պետի տեղակալ Սերգեյ Հայրապետյանը՝ տեղեկացնելով, որ այրված տարածքների մակերեսը 2018 թվականի 1-ին կիսամյակի համեմատ 2019-ի նույն ժամանակահատվածում 5.7 անգամ ավելի շատ է եղել:

Իսկ այդ հեկտարները կավելանան,եթե խոտերը չհնձեն, իսկ դա անելու համար վարչական շրջանների ղեկավարները պետք է աշխատեն: Պետք է աշխատել, հակառակ պարագայում կընկնեն Կենտրոն վարչական շրջանի ղեկավարի օրն ու սեփական ձեռքերով կանեն այն, ինչ պետք է անեն իրենց ենթակաները:

NEWSPRESS.am