«Բաջանաղների ժամանակները» չեն անցել. Արարատ Միրզոյանի հովանավորյալը պաշտոն ստացավ

Ազգային ժողովի արտահերթ նիստում այսօր քննարկվում էր Տնտեսական մրցակցության պաշտպանության պետական հանձնաժողովի անդամների ընտրության հարցը։

Վարչապետ Նիկոլ Փաշինյանն այս պաշտոնում առաջադրել էր «Իմ Քայլը» դաշինքից պատգամավորի թեկնածու, բայց այդպես էլ պատգամավոր չդարձած Էդգար Ճաղարյանի թեկնածությունը՝ երկու տարի ժամկետով և Կարեն Սեդրակյանի թեկնածությունը՝ մեկ տարի ժամկետով։

Այս երկու թեկնածուներից ուշագրավ է Էդգար Ճաղարյանի առաջադրումը․ նշենք, որ նա 75 կողմ ձայնով այսօր ընտրվեց ՏՄՊՊՀ անդամ։

Ճաղարյան էդգարը բացի այն, որ եղել է «Իմ քայլի» պատգամավորի թեկնածու, մեկ այլ առավելություն ևս ունի․ նա հանդիսանում է Արարատ Միրզոյանի հովանավորյալը։
Այլ կերպ ասած՝ Միզրոյանը քաղաքական երկնակամարում նրա տանիքն է ու նա էլ հենց Ճաղարյանի թեկնածությունն է առաջադրել Փաշինյանին և առաջարկել դարձնել ՏՄՊՊՀ անդամ. ինչպես ժամանակը ցույց տվեց՝ Փաշինյանը դեմ չի եղել։

ԱԺ-ում Էդգար Ճաղարյանը չփայլեց իր մանագիտական գիտելիքներով. Նա ՏՄՊՊՀ անդամի թեկնածու լինելով՝ տեղեկություն չուներ, որ «Զվարթնոց» օդանավակայանն ու Շիրակի օդանավակայանը շահագործվում է նույն ընկերության կողմից և նրան այս հարցում լուսավորեց ԼՀԿ-ական պատգամավոր Արման Բաբաջանյանը: Ամեն դեպքում, ո՛չ այդ տեղեկատվության բացակայությունը ու ո՛չ էլ նրա ոչ այնքնա հարուստ գիտելիքները չխանգարեցին, որպեսզի նա այս խաղում հաղթող դառնա։ 

Ճաղարյանը նույնիսկ չգիտեր, որ ինքը պատրաստվում է դառնալ մի հանձնաժողովի անդամ, որը չպետք է թույլ տա որպեսզի լինեն գերիշխող դիրք զբաղեցնող ու այդ դիրքը չարաշահող ընկերություններ: Ճաղարյանը հպարտությամբ հայտարարեց, թե՝ դեմ չէ, որ գերիշխող դիրք լինի...

Էդգար Ճաղարյանի կապերը սակայն ոչ միայն նոր, այլև նախկին իշխանության հետ է:

Դեռ ՀՀ երրորդ նախագահ Սերժ Սարգսյանի օրոք Ճաղարյանը հանդիսանում էր ՀՀ ՊՆ-ին մթերք մատակարարող հիմնական ընկերություններից մեկի սեփականատերը: Նա իր դիքրը չկորցրեց նույնիսկ Սերժ Սարգսյանին «մերժելուց» հետո:

7-10 տարի է՝ Ճաղարյանը բանակին սնունդ մատակարարող ընկերություններից մեկի սեփականատերն է և Նիկոլ Փաշինյանի իշխանության ժամանակ ՊՆ-ին մթերք մատակակարող հիմնական ընկերություն մնալու հարցում որևէ բան չի փոխվել։ 

Ի դեպ Ճաղարյանը նաև մթերք է մատակարարում Դիլիջանում գտնվող և ՊՆ ենթակայության ներքո գործող «Գորնի Արմենիա» առողջարանին, որի VIP քոթեջներից մեկում էլ շատ հաճախ տեղի են ունենում իր ու իր հովանավորյալ Արարատ Միրզոյանի հետ «փակ» հանդիպումները։

Դիլիջանի այդ ռեստորանային համալիրում են հանդիպում նրանք նաև իրենց ընտանիքներով․ քանի որ ընտանիքներով ևս ունեն ջերմ հարաբերություններ։

Ու այսպես ջերմությամբ ու սիրով Արարատ Միրզոյանը պետական կառավարման ապարատ է խցկում իր մարդկանց։

Ու ստացվում է, որ «նոր» Հայաստանը գերարագ քայլերով գնում է հնի հետևից ու փորձում հավասարվել նրան: նոր իշխանությունները ևս պետական ամբողջ ապարատը լցնում են իրենց ընկեր-բարեկամներով ու բաջանաղներով... ու այստեղ սին են դառնում Փաշինյանի պնդումները, թե «բաջանաղների ժամանակներն այլևս անցել են»։