Երբ դուխովը ճակատին և ոչ թե գլխարկին գրածն ազատ արձակվի, որտե՞ղ կլինի այս աջափսանդալի հեղինակը

Այսօր կրկին Ռոբերտ Քոչարյանը կալանավորվեց:

ՀՀ գլխավոր դատախազի դատավորը համարվող Արմեն Դանիելյանը բեկանեց նախորդ դատական ակտը և որոշեց Քոչարյանին կալնավորել և Արցախի նախկին և ներկա նախագահների անձնական երաշխավորությունը համարել առ ոչինչ:
Քոչարյանն այլևս կալանավայրում է:

Ինչ խոսք, Արցախյան պատերազմ տեսած մարդու համար բանտն էլ դժվարություն է, որի միջով կարող է անցնել ճակատին և ոչ թե գլխարկին ԴՈՒԽՈՎ գրած տղամարդը:
Քոչարյանն, անշուշտ, կնստի՝ մինչև հաջորդ դատական ատյան իր պաշտպանների բողոք ներկայացնելն ու դրա ելքը:

Գուցե հայաստանյան դատական հաջորդ ատյանն էլ որոշի բեկանել նախորդի կայացրած դատական ակտն ու Քոչարյանին ազատ արձակել ու այս խեղկատակությունը չգիտենք, թե դեռ որքան կշարունակվի:

Թեև այս խեղկատակության վերջը չի երևում, սակայն փոխարենն ակնհայտ է դարձել մեկ բան` բացառապես անցյալի հետ կռիվ տալու և հերոսանալու մոլուցքով տարված Նիկոլ Փաշինյանն այլևս քաղաքական գործոն է դարձրել Ռոբերտ Քոչարյանին:

Ռոբերտ Քոչարյանին բանտում պահելը դարձել է ներկայիս իշխանության միակ հաղթաթուղթը. Փաշինյանն արդեն իսկ այս տաս և ավելի ամիսների ընթացքում ապացուցել է, որ ապագայի հետ կռիվ տալու ունակություններից զուրկ է և որպես երկրի ղեկավար՝ ունի մեկ առաքելություն՝ ստեղծել Մարտի 1-ի բացահայտման իմիտացիա և պաշտոններով ապահովել բոլոր այն մարդկանց, ովքեր այս 10 տարիների ընթացքում Մարտի 1-ի պատասխանատու են համարել Ռոբերտ Քոչարյանին և ոչ, ասենք, Լևոն Տեր-Պետրոսյանին կամ նույն Փաշինյանին:

Անձնական հաշվեհարդարն իրենից ուժեղի նկատմամբ դարձել է իշխանության միակ նպատակն ու առաջ մղիչ ուժը, որի ֆոնին տնտեսությունն օր օրի անկում է ապրում, երկրում բիզնես միջավայրի ոչ գրավիչ տեսքի հետևանքով հեռանում են բիզնեսմենները, արտաքին ներդրումները հավասարվում են զրոյի, երկրի ամեն մի փողոցում բողոքի ակցիա է, իսկ երկրի սահմանների շուրջ՝ շատ վտանգավոր զարգացումներ:

Երկիրն այլևս բաժանված է սևերի ու սպիտակների` սպիտակները նիկոլականներն են` սևերը` քոչարյանականները:

Նիկոլ Փաշինյան-Ռոբերտ Քոչարյան մենամարտը դաշտից դուրս է մղել հանրապետականներին և որևէ այլ արտախորհրդարանական ուժի:

Այսուհետ կանգնած ենք դուխով գլխարկի տակ պատսպարված և դատաիրավական ողջ համակարգն այդ նպատակին ծառայեցնող Փաշինյանի և ճակատին դուխով գրած Քոչարյանի մենամարտի տեսարանի առջև, որի ռաունդները դասական ոչ մի կանոնի չեն ենթարկվելու: 

Անշուշտ Քոչարյանն ազատ կարձակվի, իսկ այդժամ որտե՞ղ է լինելու այս աջափսանդալի հեղինակը:

NEWSPRESS.am