Ճկռալով աշխատում ենք... ասում եմ՝ տղերք ջան, դիմացեք. Հայկ Մարության

Երևանի տարբեր վարչություններում 3-4 անգամ աշխատանքների ծավալները մեծացել են, և նոր հաստիքների անհրաժեշտություն կա, բայց քաղաքապետարանը չի ուզում հաստիքներ ավելացնել: Այս մասին Երևանի ավագանու արտահերթ նիստի ժամանակ հայտարարեց քաղաքապետ Հայկ Մարությանը:

Նա վստահեցրեց, որ տարբեր վարչություններից եկել ու իրեն ասել են, որ հաստիքներ է հարկավոր ավելացնել, քանի որ իրենք չեն հասցնում աշխատել:

«Այո՛, շատ է պետք ավելացնել հաստիքները, բայց մենք մի կերպ ճկռալով աշխատում ենք, որ չշատացնենք: Մենք ճարտարապետականով պետք է բարձրացնենք, իրավաբանական վարչությունում, անշարժ գույքի կառավարման վարչությունում պետք է բարձրացնենք: Այդ վարչության պետերն անընդհատ ինձ գալիս ու զեկուցում են՝ չենք հասցնում, պարոն քաղաքապետ, մեզ մարդ է պետք: Ես ասում եմ՝ տղերք ջան, դիմացեք, խնդրում եմ ավել աշխատեք, ավելի պրոդուկտիվ ու ինտենսիվ աշխատեք, մենք չենք ուզում այս պահին այս մասով բարձրացնել հաստիքները: Բայց, այո, օպտիմալացում չի նշանակում միայն կրճատում, կարող է մի պահ գալ, որ հաստիքների ավելացում լինի: Այս պահին այս հաստիքացուցակը որ կա, շատ մեծ դժվարությամբ մարսում է այն դիմումների քանակը, որոնք գալիս են»,- ասաց Մարությանը՝ հավելելով, որ այս քաղաքականությամբ նախատեսվում է Երևան համայնքի բյուջեի միջոցների խնայողությունը 215 մլն դրամի հասցնել: