Ասֆալտին փռելու քո դատաիրավական համակարգն է, անուններ եմ ասել քեզ, դե փռիր. անարգել են Լիլիթ Աղեկյանի հոր գերեզմանը (ֆոտո)

Իրավապահները 5-րդ շարասյուն են երկրի ներսում. նրանք իրենց աշխատանքով մեզ դարձնում են հակահեղափոխական: Այս մասին NEWSPRESS.am-ի հետ զրույցում հայտարարեց Գյումրիի բնակչուհի Լիլիթ Աղեկյանը: 

Մեր խմբագրություն ահազանգած քաղաքացին հայտնեց, որ 2017 թվականին անարգել են իր հայրիկի՝ Հրաչիկ Աղեկյանի գերեզմանը. դեպքի առիվ հարուցվել է քրեական գործ, սակայն մինչ օրս հանցագործները բացահայտված չեն:

Լիլիթ Աղեկյանը պատմեց, որ 2 տարի առաջ, այցելելով իր հոր գերեզմանին (Գյումրիի 2-րդ գերեզմանոց), նա հայտնաբերել է, որ իր կողմից տեղադրված պարսպի սալաքարերը հանված են: Դրանք կոտրված դրված են եղել գերեզմանի մոտ:

Լիլիթ Աղեկյանը դիմել է ոստիկանություն, որտեղից անմիջապես գործն ուղարկել են Քննչական կոմիտե, և հարուցվել է քրգործ:

Քրեական գործ հարուցելուց ճիշտ 49 օր անց գործը կասեցվել է:

«Ո՛չ գլխավոր դատախազից, ո՛չ Գյումրիի դատախազությունից ես չստացա պատասխան, թե ինչն է պատճառը, որ գործը կասեցվել է: Իհարկե, նրանք մեկնաբանում են, որ չի հայտնաբերվել հանցագործություն կատարած անձը, բայց հարց եմ տալիս՝ իսկ ի՞նչ եք արել, որ հայտնաբերվի»,- ասում է մեր զրուցակիցն ու նկատում, որ հարցաքննվել է ընդամենը 5 մարդ, այդ թվում նաև՝ ինքը:

Լիլիթ Աղեկյանի խոսքով՝  հարցաքննված մյուս 4 անձինք այն մարդիկ են եղել, ում անուններն ինքն էր տվել՝ որպես վկա և կասկածյալ: Իսկ ավելին ոչինչ արված չի եղել:

Քրգործով վարույթը կասեցնելու մասին պատասխանն ստանալուց հետո, Աղեկյանը բաց նամակներով դիմել է այն ժամանակ նախագահի պաշտոնն զբաղեցնող Սերժ Սարգսյանին ու էլի պատկան մարմինների, սակայն ոչ մի արձագանք չի եղել:

Գործն այդպես էլ մնացել է սառույցին գրված: 2018-ի հեղափոխությունից հետո, գործով տուժող Լիլիթ Աղեկյանի մեջ նոր հույս է արթնացել ու որոշել է կրկին դիմել գործի բացահայտման համար, այս անգամ արդեն նոր իշխանությանը:

«Նամակներով ողողեցի ողջ իրավական համակարգը՝ Մարդու իրավունքների պաշտպան, ոստիկանություն ու դատախազություն: 2018-ի հուլիսին Շիրակի մարզի դատախազությունից (դե դատախազը ՀՀ գլխավոր դատախազ Արթուր Դավթյանի սանիկն է, գիտե՛ք) պատասխան ստացա, որ գործը կասեցումից հանված է»,- ասաց Լիլիթ Աղեկյանը:

Գործը հանձնվել է նոր քննիչների ու դատախազի: Լիլիթ Աղեկյանն այս անգամ էլ դիմել է գործով նախորդ քննիչների և դատախազի նկատմամբ գործ հարուցելու հարցով՝ հիմք ընդունելով նաև տարբեր ժամանակներում գլխավոր դատախազությունից ստացած այն եզրակացությունները, որ գործով զբաղվող քննիչն ու դատախազը թերացել են իրենց աշխատանքում և բացթողումներ թույլ տվել: Սակայն թերացումների համար այդպես էլ ոչ ոք պատասխան չի տվել ու պատիժ չի կրել:

Գործը վերցրած քննիչն էլ, Լիլիթ Աղեկյանի խոսքով, փափուկ բարձ է դրել իր գլխի տակ, և կրկին սայլը տեղից չի շարժվել: Իսկ արդեն այս տարվա մայիսին 15-ին կասկածյալներից մեկը զանգահարել է Լիլիթին և հարցրել, թե ինչո՞ւ է տվել իր անունը:

«Գործի գաղտնիությունից ելնելով` ճիշտ չէ, որ ես հիմա այդ կասկածյալի անունը տամ, բայց ամսի 15-ին զանգահարեց ինձ ու ասաց, թե ինչո՞ւ եմ տվել իր անունը, իսկ դրանից 4 օր անց՝ գործն արդեն երկրորդ անգամ կասեցվեց»,- նշեց Լիլիթ Աղեկյանը:

Դրանից հետո, քաղաքացին իր խնդրով դիմում է ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանին, ԱԺ փոխնախագահ,  «Իմ քայլը» խմբակցության պատգամավոր Լենա Նազարյանին, սակայն, ինչպես ինքն է ասում, ստացել է «սվաղած» պատասխաններ:

Լիլիթ Աղեկյանը հանդիպել և նամակներով դիմել է նաև ՀՀ վարչապետ Նիկոլ Փաշինյանի հետ: 2018 թվականի հոկտեմբերի 22-ին armtimes.com-ում նաև հրապարակում կա այդ մասին:

«Ես ասել եմ Նիկոլ Փաշինյանին՝ ասֆալտին փռելու քո դատաիրավական համակարգն է, անուններով ասել եմ՝ էսինչ դատախազներն են, դե՛, փռիր ասֆալտին: Ասում ես՝ ծնոտներին ենք տալու՝ դե տո՛ւր... ես սպասում եմ, թե երբ են դատախազները Նիկոլ Փաշինյանի կոշտուկը տրորելու, որ նորից հրահանգի գնանք դատախազությունների դռները փակենք»,- նկատում է մեր զրուցակիցն ու հավելում, որ սա «ուչաստկովի մակարդակի գործ է», որը, չգիտես ինչու, չի բացահայտվում. կա՛մ ի զորու չեն, կա՛մ չեն ուզում:

Նա նաև ընդգծում է, որ եթե մարզի իրավապահներն ինչ-որ պատճառ ունեն չբացահայտելու՝ վախենում են, ապա թող գլխավոր դատախազությունից մարդ ուղարկեն ու բացահայտվի: Լիլիթ Աղեկյանը նկատում է, որ հեղափոխություն են արել, որ նման անգործության մատնված ու կողմնակալ համակարգից ազատվեն, սակայն ստացվում է, որ ամեն ինչ նույնն է:

«Մարդը Հայաստանում արժեք չէ, մարդու իրավունքների մասին խոսելը ընդամենը գրանտ շահելու միջոց է: Եթե իմ ու իմ ընտանիքի իրավունքները պաշտպանված չեն, ես կգնամ երկրից. սա ո՛չ թե շանտաժ է, այլ երկրի ղեկավարության ու իրավապահ համակարգի անգործության, մասնագիտական ոչ ադեկվատության հետևանք»,-եզրափակեց մեր զրուցակիցը:

Արմինե Մկրտումյան