Կամ լռիր, կամ՝ հեռացիր. հրաժարվում ենք աշխատավարձ վճարել անգրագիտությամբ փայլատակողներին

Չկա Ազգային ժողովի մի նստաշրջան, որի ընթացքում «Իմ քայլը» խմբակցության պատգամավորները չփայլեն իրենց «գրագիտությամբ» և «մտքի փայլատակումներով»: 

Այս գործն անելու հերթն այս անգամ իշխանական պատգամավոր Քրիստինե Պողոսյանին էր, որը երկար մտածելուց հետո եկել է այն համոզման, որ ինքն աճել է այնքան, որ կարող է ոչ միայն ԱԺ նիստերի ընթացքում գիշերն անգիր արած հարցն ուղղել կառավարության անդամներին, այլ կարող է նաև լրագրողներին հարցազրույցներ շռայլել ԱԺ միջանցքներում:

Ցավալի է, որ այս երկրորդ հանգամանքը միայն թվացյալ է, ոչ իրական, և ինչպես նրա՝ քաղաքականության մեջ դրսևորվելու ցանկացած փորձ, սա ևս ավարտվել է անհաջողությամբ:

Մասնավորապես, Քրիստինե Պողոսյանը տարել-բերել ու լրագրողներիս մոտ հպարտացել է, որ արդեն օրենսդրական նախաձեռնություններով է հանդես գալիս:

«Ես հանրության կողմից վստահության քվե եմ ստացել և իմ պարտքն եմ համարում այստեղ ներկայացնել մարդկանց իրավունքները և առաջիկա հինգ տարվա մեջ անել ամեն ինչ, որպեսզի հինգ տարի հետո մարդիկ ունենան ավելի լավ Ազգային ժողով, ավելի լավ կառավարություն: Գոյություն ունեն այնպիսի պաշտոններ, որ որոշակի հիվանդությունների դեպքում անգործունակ են ճանաչվում` դատավորներ, դատախազներ, ուսուցիչներ: Ես կարծում եմ, որ դա ուղիղ հակասության մեջ է, եթե դատավոր, դատախազ և այլն, չեն կարող աշխատել, ապա օրենսդիր մարմնում ինչպե՞ս կարող է նման սահմանափակումների միջով չանցած մարդ լինել, նախագիծ առաջ բերել, քվեարկել և այլն»,-ասել է պատգամավորը և շարունակել, թե բա՝ մշակել է օրենքի փոփոխություն, ըստ որի, հոգեկան խնդիրներ ունեցողները չպիտի առաջադրվեն պատգամավորի թեկնածու:

Պատգամավորի այս հանճարեղ մտքից չգիտես լա՞ս, խնդա՞ս, թե՞ գտնես այլ տարբերակ պատգամավորուհուն բացատրելու, որ նման անհեթեթություններ հնչեցնելով պարզապես անարգում է խորհրդարանական Հայաստանի թիվ 1 ամբիոնը, որ իր ասածը պարզապես պատվազրկում է է օրենսդիր իշխանությունը:

Կա նաև մեկ այլ տարբերակ՝ թողնել, որ Փաշինյանն ու խմբակցության ղեկավար խոնարհ հարս դարձած Լիլիթ Մակոնցն աշխատեն իրենց հաճախ ոչ ադեկվատ վարքագիծ դրսևորող պատգամավորների հետ՝ նրանց հանգամանալից բացատրեն՝ ինչու են հայտնվել օրենսդիրում, ինչ պետք է անեն և ինչպես:

Այս մարդիկ արագացված դասընթացների կարիք են զգում, որ չպատռեն «Իմ քայլի» դիմակը, որը Փաշինյանին դեռ հաջողվում է փակել կարկատաններով, որոնք օր օրի ավելանում են: 

Ի դեպ, կա նաև մի վերջին տարբերկ՝ նման անբովանդակ պատգամավորներին լսելուց հետո պարզապես պետք է նրանց դիմել լռելու կոչով. Լռեք այնքան, քանի դեռ խոսել չեք սովորել:

  NEWSPRESS.am