Ինչ է ակնարկում ՄԽ համանախագահությունը

ԵԱՀԿ Մինսկի խմբի համանախագահները տարածաշրջանային այցից հետո տարածել են հայտարարություն՝ ամփոփելով այցն ու շարադրելով իրենց առաջարկները:

Նշենք, որ նման հայտարարություններ համանախագահները տարածում են ամեն անգամ տարածաշրջան կատարած այց հետո՝ որպես ամփոփում և հաշվետվություն:

Եվ այսպես՝ այս անգամ համանախագահներն իրենց հայտարարությամբ անդրադարձել են շփման գծում և միջազգային սահմանին իրավիճակին և մարտի 29-ին Ադրբեջանի նախագահի ու Հայաստանի վարչապետի, ինչպես նաև երկու երկրների արտգործնախարարների քննարկումներին:

Համանախագահներն այս անգամ ներկայացրել են արցախյան խնդրի կարգավորման վերաբերյալ հստակ առաջարկներ, որոնք, ինչպես ասված է հայտարարության մեջ, ներառում են մարդասիրական և անվտանգության սկզբունքներ:

Մինսկի խմբի համանախագաները խորը մտահոգություն են հայտնել վերջին շրջանում ունեցած կորուստների համար և կողմերին կոչ արել առավելագույն զսպվածություն ցուցաբերել՝ իրավիճակի սրումից խուսափեու համար:

Այս հայտարարությունը հերթական անատամ հայտարարությունն է, որը Հայաստանին և Ադրբեջանին հավասարեցնում է և երկու կողմերի կոչ անում առավելագույն զսպվածության:

ՄԽ համանախագահներն այս անգամ էլ հասցեական հայտարարություն չեն արել, իսկ որ առավել ճիշտ կլիներ՝ այդ զսպվածության կոչը չեն ուղղել բացառապես Ադրբեջանին, ով կրակում է ՀՀ սահմանի, զինվոին հաց տանող մեքենայի վրա:

Վիեննայի, Սանկտ Պետերբուրգի և Ժնևի պայմանավորվածությունների մասին ևս խոսք չկա:

Այս պայմանավորվածությունների մասին համանախագահները չեն հիշում թավշյա հեղափոխությունից ի վեր, իսկ ՀՀ պաշտոնյաներն էլ նրանց այդ մասին երբևէ չեն հիշեցնում՝ հիմնավոր կասկածներ ստեղծելով, որ այս լռության նպատակն ի վերջո այդ պայմանավորվածությունների վերջնական թաղումն է:

Իսկ ինչ վերաբերում է հայտարարության մեջ նշված առաջարկին, ապա Արցախի անվտանգության երաշխավորությամբ հանդես եկող ՀՀ վարչապետը պարտավոր է հանրությանը ներկայացնել, թե ինչ մարդասիրական քայլերի մասին է խոսում կամ ակնարկում համանախագահությունը և որոնք են այդ անվտանգային միջոցները:

NEWSPRESS.am