Հյուրանոց Գերմանիայում և հաշվեհամար՝ կոռուպցիոն գործարքների համար. ՊՎԾ պետը կբացահայտի՞ հոր թնջուկը

Այժմ ՊՎԾ պետի պաշտոնը զբաղեցնող 28 ամյա երիտասարդը՝ Արգիշտի Քյարամյանը, ով այդպես էլ ո՛չ հերքում, ո՛չ էլ հաստատում է իր՝ Կոտայքի թեմի առաջնորդի որդի լինելը կամ նախկին ոստիկանապետ Վլադիմիր Գասպարյանի սանիկը լինելու վերաբերյալ տեղեկությունները, թույլ էլ չի տալիս խախտել իր անձնական կյանքի գաղտնիությունը, այնուամենայնիվ, մամուլի ուշադրությունից նոր մանրամասները չեն վրիպում:

Այս պաշտոնյայի շուրջ սկանդալները շատ են՝ սկսած հորը թաքցնելուց` մինչև կասկածելի հայտարարագրերը և շատ կամեցող քեռին, ով նրան միլիոնավոր դրամներ է նվիրել:

Բարձրաստիճան պաշտոնյան հայտարագրել է 32 միլիոն դրամ, 48 հազար ամերիկյան դոլար, երկու առանձնատուն, չորս հողամաս, հողամասին ամրացված անշարժ գույք և ավտոտնակ: Այս պաշտոնյայի հայտարարագրում առկա են նաև ութ միլիոն դրամը գերազանցող զարդեր: Նրա կինը՝ Ռուզաննա Քյարամյանը ևս պատկառելի ունեցվածքի տեր է: Նրա հայտարարագրում առկա են ոսկյա, ադամանդե և այլ ազնիվ մետաղներից ու թանկարժեք քարերից պատրաստված զարդեր, որոնց ընդհանուր արժեքը 10 հազար դոլար է: Ռուզաննա Խաչատրյանը ևս ամուսնու նման՝ միլիոններ ունի: Նա հայտարարագրել է 26 մլն դրամ և 46 հազար ամերիկյան դոլար: 4000 դոլարի էլ փոխառություն ունի:

Հանրահայտ իրողություն է, որ մինչև այսօր Արգիշտի Քյարամյանը թաքցրել է, թե ով է իր հայրը: Իսկ շշուկներն ու պաշտոնական փաստաթղթերն այդպես էլ չեն դադարում պնդել, որ նրա հայրը Էլբեկ Երեմի Քյարամյանն է:

Արգիշտի Էլբեկի Քյարամյանը, ըստ ԿԸՀ ընտրողների ռեգիստրի տվյալների, ծնվել է 1991 թվականի մայիսի 22-ին՝ Գեղարքունիքի մարզի Երանոս գյուղում: Նույն աղբյուրի համաձայն՝ Հայաստանում ընդամենը մեկ Արգիշտի Էլբեկի Քյարամյան կա, որը ծնվել է 1991 թվականի մայիսի 22-ին՝ Գեղարքունիքի մարզի Երանոս գյուղում: Նույն պաշտոնական աղբյուրի համաձայն՝ Հայաստանում նաեւ մեկ Էլբեկ Երեմի Քյարամյան կա, որը կրկին Գեղարքունիքի մարզի Երանոս գյուղից է, ծնված 1964 թվականին, ով էլ նրա հոգևորական հայրն է:

Էլբեկ Քյարամյանը, ով www.orthodoxia.ch կայքում ներկայացված է որպես Առաքել Էլբեկ Քյարամյան, եղել է նախկին ոստիկանապետ Վլադիմիր Գասպարյանի՝ հոգևոր հարցերով խորհրդականը: Շատ հետաքրքիր է նաև այս մարդու դիրքը ոստիկանական համակարգում:

Որոշ լուրերի համաձայն՝ բավականին խոշոր կաշառքները, որոնք «ֆռռացել են» համակարգում, վերջին հանգրվանն ունեցել են հոգևոր սպասավորի հաշվեհամարին, որը բացված է եղել «Արարարտ» բանկի Ծաղկաձորի մասնաճյուղում: Տարբեր գործերով կաշառքները նստեցվել են նրա այս հաշվեհամարին, ապա այստեղից ուղարկվել Գերմանիայում գտնվող՝ իրեն պատկանող մի հյուրանոցի կառուցման և կահավորման համար նախատեսված ծախսերի համար: Ի դեպ, բավականին բարձրաստիճան պաշտոնյա այս հյուրանոցում բաժնետեր է, ով էլ հոգացել է, որպեսզի օդից եկող գումարները չպակասեն և մշտապես տեղ հասնեն: Հարց է առաջանում՝ արդյոք Արգիշտի Քյարամյանը կստուգի՞ հոր ունեցվածքը, կանի՞ բացահայտումներ, թե ինչ հյուրանոց ունեն Գերմանիայում և ինչ փողերով են այն բերել վերջնական տեսքի:

Ի դեպ, ԺՊ նշանակվելուց մինչ այժմ Արգիշտի Քյարամյանի զբաղեցրած աթոռը կարծես թե դատարկ է, նա այդպես էլ մատը մատին չի տալիս, միայն թե հասցնում է հանրության մեջ արդեն իսկ վարկաբերկված և կոռուպցիայի մեջ թաթախված մարդկանց նշանակել պաշտոնների: Նրա խորհրդական է նշանակվել Աշոտ Վանյանը, ով 2008թ.-ին Գորիսի կայազորի ռազմական ոստիկանության պետն է եղել, հավանաբար, նրա այս նշանակումը եղել է ի վարձատրություն «Ազատության»-ը տված այն հարցազրույցի, թե 2008թ.-ի մարտի 1-ին Ղարաբաղից զինծառայողների շարասյուն է մտել Հայաստան, և ինքն անձամբ է դիմավորել:

Քյարամյանը նաև խոորհրդական է նշանակել կառավարման համակարգի ֆինանսական բլոկում բարձր պաշտոններ զբաղեցրած, «գունեղ» կենսագրություն ունեցող Արմեն Ալավերդյանի որդուն՝ Լևոն Ալավերդյանին:

NEWSPRESS.am