Այսօր դիմեցի Սահմանադրական դատարան. Արման Թաթոյան

ՀՀ ՄՒՊ Արման Թաթոյանն իր ֆեյսբուքյան էջում գրել է.

Հարգելի ընկերներ,

Այսօր դիմեցի Սահմանադրական դատարան:

Սահմանադրությանը համապատասխանության տեսանկյունից դիմումում վիճարկում եմ այն, որ հոգեբուժարան տեղավորելու և պահելու հետ կապված՝ երեխաների և անգործունակ չափահասների կարծիքը հաշվի չի առնվում:

Բանն այն է, որ ՀՀ գործող օրենսդրությամբ անձի օրինական ներկայացուցչի համաձայնությունն արդեն իսկ համարվում է բավարար պայման երեխաների և անգործունակ չափահասների հոգեբուժական օգնության, այդ թվում՝ հոգեբուժական հիվանդանոցում տեղավորելու համար։

Արդյունքում, խախտվում են լսված լինելու և իրազեկված համաձայնությունը տալու նրանց իրավունքները։

Ավելին, օրենսդրական թերի կարգավորումների պատճառով պրակտիկայում հաճախակի են այն դեպքերը, երբ հոգենուժարանում կամավոր բուժվող են համարվում այն անձինք, ովքեր այնտեղ պահվում այն հիմքով, որ առկա է իրենց օրինական ներկայացուցիչների համաձայնությունը:

Այս դեպքերում, սակայն, փաստացի այդ մարդիկ հոգեբուժարանում պահվում և բուժվում են իրենց կամքին հակառակ, այսինքն՝ հարկադրաբար՝ դրանով իսկ մեխանիկորեն զրկվելով դատարանում հարկադիր բուժման հարցը բարձրացնելու հնարավորությունից։

Իմ այս դիմումը կարևոր եմ համարում նաև նրանով, որ վիճարկվող կարգավորումների անկատարությունը վտանգում է իրավունքների իրացման սահմանափակ հնարավորություններ ունեցող երեխաների և անգործունակ չափահասների ֆիզիկական և հոգեկան անձեռնմխելիության, անձնական ազատության և մի շարք այլ հիմնարար իրավունքներ:

Սահմանադրական դատարանին ուղղված դիմումի հիմքում ընկած են հոգեբուժարաններում մեր մշտադիտարկման այցերի ընթացքում արձանագրված խնդիրները, ինձ հասցեագրված անհատական բողոքների քննարկման արդյունքները, ինչպես նաև միջազգային առաջադեմ փորձն ու օրենսդրական խնդիրները։

Պաշտոնական հաղորդագրությունը ստորև՝