Երկու տեր ունի, մի աստված՝ փողը

Ազգային ժողովի ՀՀԿ խմբակցության նախկին պատգամավոր, այլևս «նախկին օլիգարխ» Սամվել Ալեքսանյանի կյանքում իրավիճակ է փոխվել. նա բիզնեսմեն է դարձել․․․

Լֆիկ Սամո ու Լֆիկ Բարերար մականուններով հայտնի գործարարը տարիներ շարունակ պնդում էր, թե ինքը գործարար չէ։ Իհարկե, նրան իր բիզնեսը ծածկադմփոց անելու գործում օգնում էր նրա քաղաքական հայրը՝ անձամբ ՀՀԿ նախագահը։ Օդում կախված լուրերի համաձայն էլ՝ Ալեքսանյանը նրա «լավության տակից» յուրովի էր դուրս գալիս ու շարունակում ծաղկեցնել բիզնեսը։ Ասում են՝ նա նույնիսկ հարկերն էր վերապահումներով վճարում, բայց ամեն անգամ Ալեքսանյանին ուղղված թեմատիկ հարցին, վերջինիս պատասխանը նույնն էր․

«Չէ, չէ, ազզ ջան, ես բիզնեսով չեմ զբաղվում: Ազիզ, ես պալիտիկայով եմ զբաղվում: Պալիտիկայից հարց կա՞, տվեք ընձի, չկա՝ մի տվեք»։

Ու միայն այս տարվա մայիսի 28-ին, Առաջին հանրապետությանը նվիրված տոնակատարությանը, «պարզվեց», որ Սամվել Ալեքսանյանն, այնուամենայնիվ, բիզնեսմեն է։ Նա հպարտ հայտարարեց․

«Հիմա արդեն բիզնեսմեն եմ»։

Բայց դա բոլորը չէ․ նա ո՛չ միայն բիզնեսմեն է, այլև ավելի արտոնյալ պայմաններում է, քան նախկին իշխանությունների ժամանակ։

Սամվել Ալեքսանյանն այն նույն օլիգարխ պաշտոնյան է, ում թիկնապահները, էլի մի քանի օլիգարխների թիկնապահների հետ միասին, շարժման օրերին դուբինկաներով ծեծի էին ենթարկում երիտասարդ ակտիվիստներին ու փորձում իրենց «հավատարմությունը» վայրագությամբ ապացուցել նախկին «տերերին»․․․ 

Այդ օրերին նա ինքն էր ոտքերով հարվածել ակտիվիստի հետույքին․․․

Շարժման օրերին կոչ էր արվում նաև այլևս առևտուր չանել Ալեքսանյանին պատկանող «Երևան Սիթի»-ների ցանցից։ Ավելին՝ նրա ցանցին պատկանող խանութներն ու նույնիսկ աշխատողներն այդ օրերին հազիվ փրկվեցին հեղափոխական ոգով պարուրված ժողովրդի ցասումից և նրանց քար ու փայտից․․․

Ու այս ֆոնին արդեն անմիջապես հարց է ծագում, թե ինչպե՞ս կարող է այսօր Ալեքսանյանն այդքան արտոնյալ լինել․ այդ ինչպե՞ս այդ ցասումն արագ հանդարտվեց։ Այդ ինչի՞ շնորհիվ վարչապետի տիկին Աննա Հակոբյանն ինքն անձամբ դարձավ Ալեքսանյանին պատկանող «Ալեքս Գրիգ» տեքստիլ խանութների հագուստի անմիջական գովազդող-մոդելը․․․

Եթե դա այդպես չէ, ապա այդ ինչպե՞ս եղավ, որ Ալեքսանյանը, ով մի պահ թվում էր՝ ուր որ է «փախչելու» է երկրից, այսօր արդեն հայտարարում է, թե իր և նոր իշխանության հարաբերությունները «շատ լավ են», ու որ քիչ հարկ է վճարում, քանի որ ավելի շատ բիզնես ունի․․․

Իհարկե, կարելի է հիշել Ալեքսանյանի կողմից արված հայտարարությունը՝ իր և Նիկոլ Փաշինյանի «ախպերության» մասին, բայց պարզվում է՝ այդ հարաբերությունները պարզապես «ախպերական» չեն․․․ Ամենայն հավանականությամբ, Ալեքսանյանը հանդիսանում է միայն որպես մատակարար․ մատակարար՝ բառի բուն իմաստով․․․

Նա ակտիվորեն գումարներ է փոխանցում Աննա Հակոբյանի հիմնադրամին, հագուստով է ապահովում նրանց ու էլի նման մի շարք ծառայություններ մատուցում․․․

Բայց, պարզվում է, Ալեքսանյանի մատակարարի դերը չի սահմանափակվում միայն «թագավորական ընտանիքին» ծառայություններ մատուցելով։

Համացանցում հայտնվել ու «համառորեն» տարածվել է տեսանյութ, որտեղ, որտեղ նախկին պատգամավորը, իրար խառնված ու անհանգստացած, փոխվարչապետ Տիգրան Ավինյանի համար անձրևանոց է բացում ու կես կռացած նրան տալիս այն։

Տեսանյութում երևում է, որ Ավինյանն ինքն էլ երևի զարմացած է իրեն վերապահված վերաբերմունքից։ Բայց այստեղ խնդիրն Ավինյանը չէ, այլ հենց Ալեքսանյանի կարգավիճակը։ Նա փոխել է իր «տերերին», պատրաստ է քծնել ու տարբեր ձևաչափով ծառայություններ մատուցել ոչ միայն ղեկավարներն, այլև նրանց ենթականերին․․․ 

Ի վերջո, ըստ ամենայնի՝ «տերերը» նրան «պահում» են հենց այդ ծառայության համար․․․

NEWSPRESS.am