Ինչու է բարձրացել Զոհրապ Մնացականյանի ճնշումը

Ըստ մամուլում հրապարակված լուրերի, տեղի է ունեցել ՀՀ և ՌԴ ԱԳ նախարարներ Զոհրաբ Մնացականյանի և Սերգեյ Լավրովի հեռախոսազրույցը, որից հետո Մնացականյանի ինքնազգացողությունը վատացել է և ստիպված են եղել շտապ բուժօգնություն կանչել։ Թե ինչ են խոսել նախարարները, հայտնի չէ։

Հայկական արտաքին քաղաքական գերատեսչությունն այս հրապարակումը հերքեց, ընդ որում, բավական գռեհիկ կերպով, փորձելով հարցը գռեհկացնելով, այսպես ասած, «փչացնել» ու իջեցնել «պլինտուսի» մակարդակի։ Քաղաքական տեխնոլոգիայի տեսակետից Աննա Նաղդալյանի հերքող գրառման մոտիվացիան լիովին պարզ է։ Սակայն սա չի լուծում խնդիրը։

Գուցե և նիկոլական զոմբիացած մասսան սրան հավատա։ Գուցե և Աննա Նաղդալյանը հաջողի այս հնարքում և հարցը փակվի, սակայն այն, որ Մնացականյանը վատանալու առիթներ ունի, չի կարող հերքել ոչ ոք։ Ընդ որում, եթե հաշվի առնենք, թե ինչ մեթոդով են փորձում հրապարակումը հերքել, ապա հերքումն իսկ անուղղակի հաստատական ապացույց է։ Իսկ այն, որ Մնացականյանը իրոք վատանալու առիթ ունի՝ փաստ է։ Նախ, ՀԱՊԿ-ի դիրքորոշումը, որով, պարզ ասած, Հայաստանին «անկյուն կանգնեցրին» իր ապակառուցողական կեցվածքի համար։ Խոսքն, անշուշտ, Զասի առաջադրումն էր որպես ՀԱՊԿ ԳԽ թեկնածու։ Իհարկե, հաջորդ տարի, երբ կլրանա Հայաստանի մանդատի ժամկետը, նա կզբաղեցնի այդ պաշտոնը։

Այլ կերպ չի կարող լինել, որովհետև այլ կերպի դեպքում կարող են պարզապես Հայաստանին մեղադրել հետսովետական անվտանգային կառույցում քայքայիչ գործողություններ իրականացնելու մեջ՝ իր բոլոր հետևանքներով հանդերձ։ Մյուս հարցը, բնականաբար, կապված է Ղարաբաղյան հարցի հետ։ Առաջիկայում Մնացականյան-Մամեդյարով հնարավոր հանդիպումն է ԱՄՆ-ում՝ պետքարտուղար Պոմպեոյի պատրոնաժի ներքո։ Պարզ է, որ Մոսկվային այս հանդիպման հեռանկարը դուր չի գալիս, և այնտեղ ամեն կերպ փորձելու են այդ հանդիպումը վիժեցնել։ Հարց է՝ Երևանը ինչքանով վճռական կլինի ու կգնա այդ հանդիպմանը, կամ թե այդ վճռականության հետևանքները ինչպիսին կլինեն։

Հատկապես, որ նույնիսկ ղազախական կողմն է, որը աչքի է ընկնում ադրբեջանամետ կեցվածքով, սկսել իր կապիտալը դուրս բերել Բաքվից։ Իսկ սա արդեն ուղիղ ակնարկ է հակամարտության հնարավոր էսկալացիայի համար։ Դե, իսկ արդեն հայ-ռուսական հարաբերությունների հետ կապված խնդիրներն արդեն մշտական պատճառներից մեկը կարող են լինել Մնացականյանի ճնշման բարձրացման։

Ի դեպ, Կրեմլում այս օրերին հայազգի գործիչներ հատուկ կոչումների ու պարգևների արժանացան Պուտինի կողմից։ Նրանց շարքում էր նաև Մարգարիտա Սիմոնյանը՝ RT-ի գլխավոր խմբագիրը։ Հիշեցնենք, որ սա այն նույն Մարգարիտա Սիմոնյանն էր, որը ամիսներ առաջ լրագրողական հետաքննությամբ պարզել էր Երևանում տեղի ունեցած հայտնի սորոսական սեմինարը պետական հեղաշրջում կազմակերպելու մասին, որտեղ նաև ռուսաստանցի ներկայացուցիչներ են եղել։ Պուտինի մեսիջը կարծես թե հասկանալի է, չէ՞։

Իսկ այն, որ Փաշինյանը նկատելիորեն «խելոքացել է» հատկապես Քոչարյանի ազատ արձակումից հետո, էլի շատ բաների մասին է խոսում։ Այսքանից հետո, կարծես թե կասկած չի կարող լինել, որ Զոհրապ Մնացականյանն իրոք ճնշման տատանում կամ սրտի տագնապ է ունեցել։

NEWSPRESS.am