Դատախազությունը բողոք կներկայացնի ՀՀ վերաքննիչ դատարան. Գոռ Աբրահամյան

ՀՀ գլխավոր դատախազ Արթուր Դավթյանի խորհրդական Գոռ Աբրահամյանն անդրադարձել է ՀՀ 2-րդ նախագահ Ռոբերտ Քոչարյանի և մյուսների գործի վարույթը կասեցնելու վերաբերյալ՝ դատարանի որոշմանը: Նա իր ֆեյսբուքյան էջում, մասնավորապես, գրել է.

«Պարզաբանման կարգով տեղեկացնեմ, որ ՀՀ քրեական դատավարության օրենսգրքի 6-րդ հոդվածի 10.1-րդ կետի իմաստով քրեական գործի վարույթը կասեցնելու մասին դատարանի որոշումը հանդիսանում է գործն ըստ էության չլուծող դատական ակտ:

Չնայած այն հանգամանքին, որ օրենսգրքի 427-րդ հոդվածի առաջին մասի համաձայն առաջին ատյանի դատարանի` գործն ըստ էության չլուծող դատական ակտն ուժի մեջ է մտնում կայացման պահից, սակայն նույն օրենսգրքի 376.1 հոդվածի 3-րդ կետի համաձայն՝ առաջին ատյանի դատարանների՝ գործով վարույթը կասեցնելու որոշումները վերաքննության կարգով բողոքարկման ենթակա են:

Այս իմաստով 2008թ. մարտի 1-ին և 2-ին կատարված իրադարձությունների վերաբերյալ անջատված և դատարան ուղարկված քրեական գործի վարույթը կասեցնելու և ՍԴ դիմելու վերաբերյալ Երևանի առաջին ատյանի ընդհանուր իրավասության դատարանի կողմից կայացված դատական ակտի դեմ վերաքննիչ բողոք ներկայացնելն իրավաչափ է:

ՀՀ դատախազությունում ուսումնասիրվել է նշված դատական ակտը և ներկայումս նախապատրաստվում է վերջինիս դեմ ՀՀ վերաքննիչ դատարան ներկայացվելիք բողոքը»:

 Ավելի ուշ՝ Գոռ Աբրահամյանը կատարել է ևս մեկ գրառում.

«Որպես հավելում նախորդ գրառման և իբրև պատասխան վերջինիս վերաբերյալ փաստաբան Արամ Վարդևանյանի գեղեցիկ փաթեթավորված, բայց խիստ յուրովի մեկնաբանությունների.

Նախ՝ հստակ ներկայացրել ենք խնդրո առարկայի վերաբերյալ իրավակարգավորումների շրջանակը: Եթե ոմանք դա չեն ընկալում, նշում ենք վերստին: ՀՀ քրեական դատավարության օրենսգրքի 6-րդ հոդվածի 10.1-րդ կետի իմաստով քրեական գործի վարույթը կասեցնելու մասին դատարանի որոշումը հանդիսանում է գործն ըստ էության չլուծող դատական ակտ:

Նույն օրենսգրքի 427-րդ հոդվածի առաջին մասի համաձայն առաջին ատյանի դատարանի` գործն ըստ էության չլուծող դատական ակտն ուժի մեջ է մտնում կայացման պահից: Չնայած այդ հանգամանքին, օրենսգրքի 376.1 հոդվածի 3-րդ կետը սահմանում է, որ առաջին ատյանի դատարանների՝ գործով վարույթը կասեցնելու որոշումները վերաքննության կարգով բողոքարկման ԵՆԹԱԿԱ են:

Երկրորդ՝ եռաստիճան դատական համակարգի կողմից արդեն իսկ իրավական գնահատականի արժանացած խնդիրները դատավարական այս փուլում, սկզբունքորեն հակասելով արդեն իսկ իր կողմից կայացված մեկ այլ դատական ակտի տրամաբանությանը, Սահմանադրական դատարանի քննարկմանը ներկայացնելը կամայական վարքագիծ է, որն արտահայտվում է ապօրինի ու անհիմն դատական ակտով: Իսկ նման ակտը մրցակցային դատավարական այբուբենի կանոնով առնվազն ենթակա է բողոքարկման՝ ստորադաս դատարանին արդեն արդարադատություն իրականացնելուց չհրաժարվելու սահմանադրական պարտավորության կատարմանը վերադարձնելու լեգիտիմ պահանջով:

Նման վարքագիծը արհեստականորեն ձգձգում է գործով արդարադատության իրականցման գործընթացը»: