Դատարանում ինչն էր տանջում Բակո Սահակյանին. կասկա՞ծ, թե՞ վտանգի զգացողություն

Հայաստանի նորանկախ պատմության մեջ 2018-2019 թվաններին պատմական իրադարձություններ են տեղի ունենում:

Նախ «Թավշյա հեղափոխությունը», այժմ էլ` Հանրապետության 2-րդ նախագահի դատավարությունը դառնում են առանցքային իրադարձություններ, որոնք անպայման տեղ կգտնեն պատմության դասագրքերում:

Պատմության դասագրքերում նաև տեղ կգտնի Արցախի նախկին և ներկա նախագահների՝ դատարան այցելությունը:

Բակո Սահակյանն ու Արկադի Ղուկասյանն առաջին անգամ ներկայացան հայաստանյան դատարան, որպեսզի երաշխավոր կանգնեն իրենց ընկերոջ և ՀՀ 2-րդ նախագահ Ռոբերտ Քոչարյանի ազատության համար:

Հիրավի, դատարանի դահլիճում Քոչարյանի և Արկադի Ղուկասյանի ջերմ գրկախառնությունը չվրիպեց որևէ մեկի աչքից:

Դատական նիստի ընթացքում Քոչարյանն ու Ղուկասյանը հաճախ էին փոխանակվում կարոտած ու ջերմ հայացքներով:

Նույն զգացողությունը, սակայն, չկար Բակո Սահակյանի պարագայում:

Արցախի գործող նախագահը զգաստ էր, լարված և, ինչո՞ւ չէ, որոշ չափով նաև նյարդային:
Ակնհայտ էր, որ նա նույն ազատությունը չունի դատարանում, որն ուներ Արկադի Ղուկասյանը:

Իսկ ի՞նչն էր Բակո Սահակյանի այս լարվածության պատճառը՝ մի՞թե Արցախը հեղափոխության օջախ դարձնելու մտավախությունը, իսկ այն, որ նման վտանգ Արցախի գլխին կախված է, փաստ է:

Բակո Սահակյանը դեռ Արցախի նախագահն է, որովհետև հեղափոխական ալիքն Արցախ դեռ չի հասցրել Փաշինյանն ու նրա համար ցանկացած պարագայում ծառայություններ մատուցող «Սասնա ծռեր» զինված խումբը, որն այժմ կուսակցություն է կոչվում:

Հիշենք, որ այս խմբի անդամներն ազատության մեջ են բացառապես Նիկոլ Փաշինյանի քաղաքական որոշման արդյունքում:

Այո՛, Բակո Սահակյանը դեռ Արցախի նախագահն է, բայց բավական է գեթ մեկ հակափաշինյանական լարում, և այդ կայծը կարող է բռնկվել Արցախում, ինչն էլ զգալով, բայց մեծ պարտավորություն ու անցած ուղի ունենալով Քոչարյանի հետ, Բակո Սահակյանն Արցախից հասել էր դատարան՝ ասելու, որ Քոչարյանն ազատության մեջ չի փախչի. խնդրելու, որ դատարանը նրա խափանման միջոցը փոխի:

Կմարսի՞ Բակո Սահակյանն իր այս համարձակ քայլը, կերևա մոտ ապագայում:

Եթե դատարանն, այնուամենայնիվ, մայիսի 18-ին որոշի փոխել Քոչարյանի խափանման միջոցն ու նրան ազատ արձակել դատարանի դահլիճից, չի բացառվում, որ դրանով տրվի հեղափոխության մեկնարկն Արցախում:

Իսկ այդժամ Բակո Սահակյանը Ռոբերտ Քոչարյանից կսպասի նույնպիսի աջակցություն, ինչպիսին վերջինս ստացավ այսօր, որպես մեղադրյալ, դատարանում:

NEWSPRESS.am