Բրյուսել. Ալիևն աշխատում է, Փաշինյանը՝ 20 հոգու հետ համերգ գնում

Փաշինյանը տիկնոջ՝ Աննա Հակոբյանի հետ մայիսի 12-13-ն աշխատանքային այցով մեկնել է Լյուքսեմբուրգի Մեծ Դքսություն և Բրյուսել:

Հայկական 15 հոգանոց պատվիրակությանը Բրյուսելում պաշտպանում է անվտանգության 6 աշխատակից. ստացվում է՝ պետական բյուջեի հաշվին Հայաստանից Բրյուսել է մեկնել ընդհանուր թվով՝ 21 հոգի:

Նրանց կեցության ապահովման ու վոյաժների համար հարկատուներիս հաշվին մի կերպ գոյատևող պետբյուջեից կծախսվեն միլիոններ, իսկ ինչի դիմաց՝ խիստ անորոշ է:
Պարզվում է, որ զգացմունքի համար ամուսնու հետ Բրյուսել հասած Աննա Հակոբյանն ու վարչապետ Փաշինյանն այնտեղ են մեկնել ընդամենը համերգի մասնակցելու համար:

Նիկոլ Փաշինյանը չի մասնակցելու Արևելյան գործընկերության ծրագրի հիմնադրման տասնամյակի գագաթնաժողովին, որը տեղի է ունենալու Եվրոպական հանձնաժողովի նախագահ Ժան Կլոդ Յունկերի նախաձեռնությամբ և ղեկավարությամբ:

Փաշինյանը կմասնակցի միայն Դոնալդ Տուսկի անունից կազմակերպվելիք տոնական ճաշկերույթին և համերգին, և սա այն դեպքում, երբ Եվրամիության և Ադրբեջանի միջև խոսվում է նոր ռազմավարական գործընկերության համաձայնագրի նախաստորագրման մասին:

Ասել է թե՝ ԵՄ-Ադրբեջան նոր թափով ռազմական համագործակցություն է սկսվում: Պարզից էլ պարզ է, որ Ադրբեջանի պարագայում ցանկացած ռազմական համագործակցությունն ուղղված է մեզ՝ հայերիս դեմ, իսկ մեր երկրի ղեկավարը համերգ է գնում:

Նրան, փաստացի, չի հետաքրքրում, թե Ադրբեջանի հետ ռազմական համագործակցության արդյունքում ինչ փաստաթուղթ կստորագրվի՝ ինչ հակայկական ձևակերպումներով, և դա այն դեպքում, երբ Ադրբեջանը կրակում է Հայաստանի սահմանի վրա, կրակում է հացի մեքենայի վրա, ինժեներա-շինարարական շատ լուրջ աշխատանքներ է սկսել իր սահմանին:

Սրանք հարցեր են, որոնք Փաշինյանին չեն հետաքրքրում. Դրա համար էլ Փաշինյանը հասել է Բրյուսել, բայց ջանք չի թափի այնտեղ գտնվող Ադրբեջանի նախագահի հետ հստակ օրակարգով մի հանդիպում ունենալ. Փաշինյանի խոսնակն արդեն հայտնել է, որ եթե անգամ Ալիևի հետ հանդիպում ունենա՝ դա կլինի ոչ ֆորմալ բնույթի, ասել է թե՝ առանց օրակարգի, առանց հստակ հարցադրումների ու դրանց պատասխանների:
Ու այս ամենից հետո չհարցնել՝ «գնացել եք Բրյուսել, որ ի՞նչ անեք», անհնար է:

NEWSPRESS.am