Փաշինյանն արդյո՞ք իրականում կլուծի Գյումրիի փողոցաշինության խնդիրը

ՀՀ վարչապետ Նիկոլ Փաշինյանի՝ Գյումրի կատարած վերջին այցելության ժամանակ ու դրանից հետո, որոշակի մի ժամանակահատված, բավական խոսվեց փողոցաշինության խնդիրների մասին: Այն, որ Գյումրիում ոտք դնելու տեղ չկա, ու քաղաքում մի կտոր նորմալ ասֆալտ չի մնացել, ասում են բոլոր գյումրեցիները:

Տեղական իշխանություններն արդարանում են, որ իրականացվում է լայնամասշտաբ փողոցաշինություն, միջազգային վարկային ծրագրով, որին, ի դեպ, վաղուց էին սպասել:

Տեղի բնակիչներն էլ դժգոհում են՝ որ փողոցաշինություն է իրականացվում, այն էլ՝ լայնամասշտաբ, հասկանում են, բայց իրենք էլ հո էդ ընթացքում չեն թողնելու գնան քաղաքից, բա գոնե տարրական հարմարավետության մասին ո՞վ պետք է մտածի: Թեման ինքնին կա ու խնդիրը բաց է: Իշխանության համար սա կարգավորելի առաջնահերթ խնդիրներից է, քանի որ այս տարվա Անկախության օրվա միջոցառումները իրականացվելու են հիմնականում մշակութային մայրաքաղաքում:

Եվ ահա, բավական հետաքրքիր հայտարարությամբ երեկ հանդես եկավ ՀՀ Քննչական կոմիտեն: Պարզվում է, որ ՀՀ ՔԿ Շիրակի մարզային քննչական վարչությունում հասարակական սեկտորի կողմից «Մասնակցային մոնիտորինգ՝ հանուն բարեկարգ և որակյալ ճանապարհներ Գյումրիում» ծրագրի շրջանակներում իրականացվել են ուսումնասիրություններ, որոնց արդյունքները ներկայացվել է մարզային դատախազություն, որն էլ հարուցել է քրեական գործ Գյումրի քաղաքի մի շարք փողոցների վերանորոգման աշխատանքների ընթացքում սահմանված նորմատիվներից հայտնաբերված շեղումների հետ կապված:

Հարուցված քրեական գործը ՀՀ քրեական օրենսգրքի 308-րդ հոդվածի 1-ին մասի և 214-րդ հոդվածի 1-ին մասի հատկանիշներով է, այսինքն՝ ըստ էության կատարվել է այն, ինչի մասին ասել էր վարչապետ Փաշինյանն իր մեծ ասուլիսի ընթացքում, անդրադառնալով խնդրին:

Իհարկե, բուն խնդիրը հասկանալի է, սակայն կա նաև խնդրի քաղաքական կողմը: Օրեր առաջ մամուլում շրջանառվեցին լուրեր այն մասին, որ Փաշինյանի վարկանիշն արդեն երեսուն տոկոսի շրջանում է, ու շեշտակի անկումը շարունակվում է: Մենք արդեն գրել էինք այն մասին, որ վարկանիշի անկումը գոնե ժամանակավոր կասեցնելու համար, հնարավոր է իշխող թիմը փորձի արդեն մարզերում ԱԱԾ ու իրավապահ համակարգի մյուս ներկայացուցիչների մասնակցությամբ հայտնի շոուները կազմակերպի:

Ու այս դեպքում արդեն կա լուրջ մտավախություն, որ տեղերից լուրջ խնդիրները, որոնք բարձրացվել են կառավարությանը, հնարավոր է ի վերջո ունենան նույն ճակատագիրը, ինչ հայտնի «մասկի շոուները»: Բացի այդ, եթե երևանյան օլիգարխիան կա՛մ մուծվում է կա՛մ հեռանում երկրից, մարզային օլիգարխիան դեռ կարծես թե չի սկսել մուծվել: Այդ մասին գոնե մամուլում հրապարակումներ չկան:

Ու այս համատեքստում, մարզաբնակները պետք է լինեն աչալուրջ, որպեսզի իրենց խնդիրների ալիքների վրա Աննա Հակոբյանի հիմնադրամներին նոր մուծվողներ ի հայտ չգան, ու փրկեն իրենց կաշիները, հատկապես որ արդեն մի քանի դրվագով տեսնում ենք, թե ինչպես է փորձում Փաշինյանն ուրիշի ձեռքերով կրակից հանել շագանակներ ու ապա նրանց քցել, ինչպես պայմանական ասված սորոսականների պարագայում եղավ, երբ նրանց օգնությամբ նաև իրականացրեց իշխանափոխություն, սակայն այսօրվա իրականությամբ նրանց կարկառուն ներկայացուցիչ Դավիթ Սանասարյանին մեղադրանք է առաջադրված: