Դատախազության առաջարկած կարգավորումն էականորեն վտանգելու է բանկային համակարգի կայունությունը. Թանդիլյան (տեսանյութ)

Ազգային ժողովի «Լուսավոր Հայաստան» խմբակցության պատգամավոր Մանե Թանդիլյանն ԱԺ իր ելույթում անդրադարձավ «ՀՀ դատախազության 2018 թ. գործունեության մասին» հաղորդման մեջ առկա բանկային գաղտնիքի հատվածին:

«Մասնավորապես նշվում է, որ բանկային գաղտնիքի օրենքի գործող կարգավորումը, համաձայն որի՝ բանկերը քրեական գործով կասկածյալ կամ մեղադրյալ ներգրավված անձանց վերաբերյալ բանկային գաղտնիք կազմող տեղեկությունները քրեական հետապնդում իրականացնող մարմիններին տրամադրում են միայն դատարանի որոշման հիման վրա, սույն օրենսգրքի և ՀՀ քրեական դատավարության օրենքսգրքին համապատատասխան, դատախազությունը համարում է խոչընդոտ հանցագործությունների բացահայտման գործում: Մասնավորապես՝ խնդրահարույց է համարվում բանկային գաղտնիքի տրամադրումը միայն կասկածյալի կամ մեղադրյալի վերաբերյալ և առաջարկում է օրենքում փոփոխություն կատարել՝ հանելով այդ մասը՝ տալով իրավունք ցանկացած անձի վերաբերյալ ստանալ բանկային գաղտնիք պարունաող տեղեկություններ»,- մեջբերեց Թանդիլյանը:

Ըստ նրա՝ բանկային գաղտնիքը բանկային համակարգի կայունության և հուսալիության գլխավոր գրավականներից մեկն է:

Թանդիլյանն առաջարկեց պատկերացնել, թե ինչ կլիներ, եթե չլիներ բանկային գաղտնիքը և բանկերում առկա ամբողջ տեղեկատվությունը հասանելի լիներ յուրաքանչյուր ցանկության դեպքում. «Ակնհայտ է, թե քանի օր, եթե չասեմ՝ քանի ժամ կտևեր բանկային ավանդների դատարկելը»: 

Նա նշեց, որ ինքը հասկանում է՝ դատախազության նպատակը բարի է, այն է՝ կոռուպցիայի դեմ պայքարը, սակայն այն կարգավորումը, որն առաջարկում է դատախազությունը, ըստ Թանդիլյանի, էականորեն վտանգելու է բանկային համակարգի կայունությունը: 

«Մասնավորապես՝ որևէ մեկն այլևս ապահոված չի լինելու, որ իր հաշիվների մասին տեղեկությունը հասանելի չի լինելու քննիչի մեկ գրությամբ: Ամենևին կասկածի տակ չդնելով իրավապահների պրոֆեսիոնալիզմը՝ սակայն ցանկացած դրվագով բանկային գաղտնիք ստանալու իրավունքի առկայությունը, որը չի առաջացնելու որևէ պատասխանատվություն, դառնալու է ցանկացած հանցագործության առաջին իսկ քայլը: Այսօր բանկային համակարգում առկա է 1 մլն-ից ավել բանկային հաշիվ և մի քանի հնարավոր հարյուր գործերի համար փոխել ամբողջ համակարգի կարգավորումը, համարում եմ ուղղակի անթույլատրելի»,- ընդգծեց Թանդիլյանը: 

Պատգամավորն առաջարկեց մեծացնել կասկածյալի տիրույթը, ինչը հնարավորություն կտա ավելի արագ տեղեկատվություն ստանալ բանկային գաղտնիքի մասին: Կամ կարելի է դիտարկել պաշտոնատար անձանց մասին այլ կարգավորում, օրինակ՝ վարկային պատմության հրապարակում:

Նա եզրափակեց իր խոսքը՝ նշելով, որ սա կարող է դառնալ այն դեպքերից, երբ ունքը սարքելու փոխարեն՝ աչքն էլ վնասենք: