Հայկ Մարությա՛ն, ամաչելու ես նաև քաղաքապետ լինելուցդ

Պարզվում է՝ Երևանի քաղաքապետ Հայկ Մարությանի պատանեկությունն այնքան էլ գունեղ չի եղել: Նա ավագանու նիստում ասել է, որ 16 տարեկանից աշխատել է:

Պատկերացնո՞ւմ եք, նա 16 տարեկանից «պետության գործառույթն իր ուսերին վերցրած» աշխատել է և ով գիտի՝ որքա՞ն են ոտնահարվել անչափահասի՝ նրա իրավունքները:

Սովորաբար 16 տարեկանները քոլեջ ու դպրոց են գնում, ուսանում ու վայելում վառ պատանեկությունը: Եթե, օրինակ, նա այդ տարիքում չաշխատեր՝ գուցե հիմա ավելի մեծ էնտուզիազմով աշխատեր, քանի որ հիմա ավելի պատասխանատու գործի է և նրա աշխատանքից է կախված շատ երեխաների և մեծահասակների կյանքի որակը:

Օրինակ, եթե Հայկ Մարությանը լավ աշխատեր, մենք այսօր չէինք ունենա արևելյան երկրների շուկայի նմանվող Հանրապետության հրապարակ, քաղաքի այլ բանուկ հատվածներում փողոցում չէր վաճառվի սնունդ, ինչպիսին, օրինակ, Փակ շուկայի դիմացի երկայնքով ծավալված փողոցային առևտուրն է և ամեն քայլափոխի չէինք հանդիպի մուրացիկների, ովքեր բաղաձայն, առանց որևէ գեղեցիկ ելևէջի երաժշտություն են հորինում ու երգում, պարում ու փող մուրում:

Երևանի կենտրոնը գռեհկությամբ, ռաբիսով ու գարշահոտությամբ է լցված և դրա միակ մեղավորը Հայկ Մարությանն է, ով իշխանության գալուց առաջ խոստանում էր՝ մաքրելու ենք:

Մարությանը խաբեց ժողովրդին, ստացավ քվեներն ու քաղաքը աղբից չմաքրեց:

Առնետավազքը սովորական տեսարան է քաղաքի ծայրամասերում ապրողների համար, շոգն ու ձմերուկն էլ՝ ամառվա սեզոնին առկախված վտանգ երևանցիների համար:

Նույնքան անմխիթար վիճակ է նաև ճանապարհաշինության ոլորտում: Նկատեցինք, որ ասֆալտապատման աշխատանքներ են սկսվել Մալաթիայի շուկայի հարևանությամբ, որտեղ ասֆալտը գրեթե իդեալական էր, իսկ դրան զուգահեռ՝ կան փողոցներ, որտեղ ասֆալտապատման տեխնիկան տարիներ շարունակ այդպես էլ չմտավ:

Օրինակ՝ դիտեք ստորև ներկայացված տեսանյութը, որը վարորդներից մեկն է տեղադրել համացանցում:

Թվարկվածները պրիմիտիվ, բայց լուծում պահանջող խնդիրներ են, որոնք չի կարողանում լուծել շոուների մեծ մասնագետ Հայկ Մարությանը, փոխարենը ձգտում է յուրայիններին գործեր պաս տալ, պետական գնումներ կատարել այնպես, ինչպես իրեն է ձեռնտու, քաղաքապետարանն ու վարչական շրջանները լցնել սեփական անբան կադրերով և բարձրացնել նրանց աշխատավարձերը` այդպիսով յուրայինների աչքին լավը երևալու մղումով:

Ըստ որոշ պնդումների՝ Հայկ Մարությանն արդեն մի քանի անգամ սեփական կամքով խնդրել է իրեն քաղաքի ծանր բեռից ազատել, սակայն այդպես էլ Փաշինյանը չի ուզում «խայտառակվել նոր ընտրությամբ», փոխարենը խայտառակվում է անգործությամբ: Չէ՞ որ մարդիկ արդարացիորեն հարց են բարձրացնում՝ ի՞նչ է անում շոումենը այդ պատասխանատու պոստին, ո՞վ է նրան թույլ տվել ժողովրդի աղքատության այս փուլում կրկնապատկել քաղաքապետարանի 1700 աշխատակիցների աշխատավարձերը:

Ի դեպ, օպտիմալացումների այս փուլում, երբ սփյուռքն ու մշակույթը ստորադասվեցին, իսկ քաղաքապետարանում օպտիմալացում չիրականացվեց, Երևանի գործերի կառավարմանը լծված են օգնականների օգնականներ, քարտուղարուհիների քարտուղարներ` թվով 1700 աշխատակից:

Դրական է, որ անսալով քննադատություններին՝ Մարությանը չգնաց աշխատավարձերի բարձրացման քայլին, թե չէ՝ հիմք կդրվեր բողոքի հզոր ալիքի, ինչն այս պահին ձեռնտու չէ իշխանություններին:

Պարզվում է նաև, որ Մարությանն այս մի քանի ամսվա ընթացքում հասցրել է բարդույթներ ձեռք բերել: Նա դիմել է «Արմենիա» TV-ին՝ խնդրելով այլեւս չցուցադրել իր մասնակցությամբ ֆիլմերը, սակայն հեռուստաընկերությունից ներողություն են խնդրել եւ մերժել։ Հեռու չէ նաև այն օրը, երբ Մարությանը կամաչի նաև իր քաղաքապետական անցյալի համար, սակայն այդ դեպքում դժվար կարողանա իր ձախողումների մասին հիշողությունները ջնջել ժողովրդի մտքից:

NEWSPRESS.am