Ինչպես նախկին, այսօրվա իշխանությունների կողմից էլ հաշվի չի առնվում պետական պաշտոններին ծառայած–չծառայած լինելը. Մարուքյան

«Լուսավոր Հայաստան» կուսակցության ղեկավար Էդմոն Մարուքյանի գնահատմամաբ, բանակի ներքին կառուցվածքում շատ մեծ փոփոխություններ դեռ տեղի չեն ունեցել։ Նա «Հաղթանակի զբոսայգում» կազմակերպված միջոցառումից առաջ լրագրողների հետ զրույցում նկատեց, որ փոխվել է միայն բանակից փողով ազատվելու տրամաբանությունը:

«Այս օրերին դժվար է փողով բանակից ազատվելը, դրանում վստահ եմ: Այդ արատավոր երևույթների սողանցքները պետք է փակել և փակվում են, բայց, որ ասենք բանակի ներքին կառուցվածքը փոխվել է, դա վաղ դատողություն կլինի»,- ասաց Էդմոն Մարուքյանը:

Նրա կարծիքով ինչպես նախկին, այսօրվա իշխանությունների կողմից էլ հաշվի չի առնվում պետական պաշտոններին ծառայած–չծառայած լինելը։ Մարուքյանը վստահեցրեց, որ եթե իրենք գան իշխանության՝ այս հանգամանքն անպայման հաշվի կառնեն:

Անդրադառնալով ՀՀ վարչապետ Նիկոլ Փաշինյանի հայտարարությանը, թե բանակում չպետք է լինի զինվոր, որ «մայկա–տրուսիկ» չունենա` Մարուքյանը ասաց. «Վարչապետը երևի փոխաբերական իմաստով է դա ասել։ Ես չեմ հիշում այնպիսի ժամանակաշրջան, որ մեր զինվորը «մայկա–տրուսիկ» չի ունեցել: Այլ բան է, որ ծնողը միշտ էլ ուղարկել է, հիմա էլ ուղարկում է, և դա ոչ ոք չի կարող արգելել»:

Մարուքյանի դիտարկմամբ, Փաշինյանի հայտարարությունը պետք է դիտարկել այլ համատեքստում: Իսկ ավելի կոնկրետ այն, որ եթե Արցախում 100 մլն դոլարի ներդրում արված լինեին, ապա ապրիլին այդքան զոհ չէինք ունենա, բայց դա չի արվել, իսկ մարդիկ են եղել ու կան, որ միլիոնավոր դոլարներ են աշխատել:

Չնայած դրան, դեռևս այդ մարդկանցով ոչ ոք չի զբաղվում: Համենայնդեպս Մարուքյանը նկատում է, որ այդ մասին հայտարարություններ արվեցին, սակայն անհետևանք մնաց:

«Կարծում եմ` կա՛մ չպիտի նման հայտարարություն անեն, կա՛մ էլ պետք է զբաղվեն դրանով»,–ասաց նա։