Ի՞նչ է ուզում Միքայել Մինասյանը, որ «գծերն է ստուգում»

Սուրբ Աթոռում, Պորտուգալիայում և Մալթայի Ինքնիշխան Ուխտում Հայաստանի Հանրապետության նախկին դեսպան Միքայել Մինասյանը հեղինակային հոդված է հրապարակել Կանադայի «Հորիզոն» շաբաթաթերթում:

Ավելի վաղ Միքայել Մինասյանը հոդված էր հեղինակել նաև ռուսական «Նեզավիսիմայա գազետա» պարբերականում։

Եթե ռուսական լրատվամիջոցում հրապարակված հոդվածը հայ-ռուսական հարաբերությունների նոր մոդելի ձևավորման մասին էր, ապա կանադահայ «Հորիզոն»-ում հրապարակված հոդվածը՝ համահայկական օրակարգի։ Երկու հոդվածներն էլ կարելի է ասել՝ հայեցակարգային են, ու, ըստ էության, շարադրում են նախկին դեսպանի մոտեցումները երկու կարևոր հարցերի հետ կապված՝ ժամանակակից հայկականություն ու հայ-ռուսական հարաբերություններ։ Ընթերցողը կհիշի հավանաբար, որ նախկին դեսպան Մինասյանի՝ ռուսական մամուլում հոդվածի հրապարակումից հետո Հայաստանի վարչապետ Նիկոլ Փաշինյանն անհասկանալի խանդով բռնված, հանդես եկավ Ուկրաինայի ընտրված նախագահ Վլադիմիր Զելենսկուն ուղղված՝ Պուտինի հետ շփման «մաստեր կլասով»։ Այս հոդվածից հետո թե ինչ հակազդիչ քայլ կձեռնարկի վարչապետ Փաշինյանն, ասենք, սփյուռքին դուր գալու համար, դժվար է ասել, ու ըստ ամենայնի՝ էական էլ չէ։ Էականն այս հարցում այն է, թե ինչու Միքայել Մինասյանը, որոշեց անդրադառնալ Հայաստան-սփյուռք հարաբերություններին ու, առհասարակ, ժամանակակից հայկական ճարտարապետությանը։ Հետաքրքիր մի նրբերանգ կա, որն աչքաթող անելը պարզապես անհնար է։

Ըստ էության, Մինասյանը փորձում է տարբեր ուղղություններով հասկանալ տիրապետող մտայնությունները, շոշափել տրամադրությունները ինչ-որ լուրջ քայլից առաջ, ու այսկերպ կարելի է բացատրել նրա հետևողականությունը՝ հայ ժողովրդի համար կենսական կարևորություն ունեցող հարցերի առնչությամբ իր դիրքորոշումները բովանդակող հոդվածներով ժամանակ առ ժամանակ հանդես գալու հետ կապված։

Հայկական մամուլում վաղուց է խոսվում, որ նախկին դեսպանը քաղաքական հայտ է ցանկանում ներկայացնել հայաստանյան քաղաքական դաշտում։ Մենք արդեն առիթն ունեցել ենք գրելու, որ այդ հայտը կարող է հաջողություն ունենալ, եթե նա կարողանա իրեն առանձնացնել նախկին իշխանությունների հետ որևէ ասոցացումից։ Կարծես թե նրան դա հաջողվում է անել։ Կամ գոնե գործող իշխանությունների խայտառակ սխալների ֆոնին, այդ հարցը ինքնաբերաբար փակվում է։ Մնում է ուրեմն հասկանալ, թե կոնկրետ ինչ ժամկետներում է Սրբազան Քահանայապետին Հայաստան բերած՝ Սերժ Սարգսյանի փեսան ցանկանում մուտք գործել հայկական՝ տուրբուլենտության փուլում գտնվող, անցումային շրջանի պիեսի առաջին արարը խաղացող քաղաքական դաշտ։

NEWSPRESS.am