«Լո-լո»-ներ՝ թվերի փոխարեն

ՀՀ տնտեսական զարգացման և ներդրումների նախարար Տիգրան Խաչատրյանը երեկ ամփոփեց 2019 թվականի առաջին չորս ամսվա տնտեսական ցուցանիշները:

Նախարարը շատ մտահոգիչ վիճակագրություն ներկայացրեց, ըստ որի՝ ՀՀ-ից արտահանման ծավալները կրճատվել են 8,6 տոկոսով, իսկ ներմուծումը կրճատվել է 3․2 տոկոսով։

Տիգրան Խաչատրյանը նաև հավելեց, որ ներդրումների առումով կան մտահոգություններ, դրանք այն մակարդակի վրա չեն, որը պետք է լինեին:

Սա երկրի տնտեսության թիվ մեկ պատասխանատուի գնահատականն է երկրում ընթացող տնտեսական գործընթացների վերաբերյալ:

Վարչապետ Նիկոլ Փաշինյանը, պարզվում է՝ կամ չի հետևել նախարարի ասուլիսին և հնչեցված վիճակագրությանը, կամ գերադասում է լսել մի բան, բայց ասել լրիվ հակառակը:

Այսօր Արարատի մարզում հրավիրված՝ «Իմ քայլը հանուն Արարատի մարզի» ներդրումային բիզնես ծրագրերի համաժողովի ժամանակ Փաշինյանն այնպիսի ելույթ ունեցավ, որը որևէ աղերս չուներ արձանագրված իրական թվերի հետ. իսկ տնտեսությունը թվերն են և ոչ թե «լո-լո»-ները:

Փաշինյանն ասաց, որ այս փոփոխությունը (նկատի ունի հեղափոխությունը խմբ.) ՀՀ-ին պետք է դարձնի աշխարհի առաջատար տնտեսական երկրներից մեկը, իսկ թե ինչպես է դա տեղի ունենալու ներմուծումների և արտահանումների անկման ֆոնին՝ չմանրամասնեց:
Փոխարենը, ինչպես ամենուր, այստեղ ևս ծավալուն ելույթ ունեցավ քաղաքական հեղափոխության մասին:

Հիշեցնենք, որ նա այդկերպ վարվեց նաև միջազգային ամենակարևոր հարթակներում. թողած պետության կարևոր խնդիրները, արտաքին քաղաքական մարտահրավերները, կրկին պատմեց, թե ինչպես Հայաստանում հեղափոխություն տեղի ունեցավ:

Այսօրվա տնտեսական համաժողովի ժամանակ ակնկալվում էր վարչապետից լսել հստակ վիճակագրություն՝ Հայաստան մտած ներդրումների, տնտեսության՝ հեղափոխական քայլքին համընթաց զարգացումների, բացվող նոր գործարանների, ստեղծվող և ոչ թե ստվերից դուրս եկող աշխատատաեղերի մասին, ինչը խթան կհանդիսանար ցանկացած պոտենցիալ ներդրողի համար վեր կենալ, դուխով գալ Հայաստան և ներդրում անել հենց այս երկրում:

Ակնկալվում էր, որ տնտեսական ֆորում ասվածը գործարարի համար պետք է լիներ հնարավորություն՝ մեր երկրի արդյունաբերական ճյուղերի, զարգացող ոլորտների, բիզնեսին չխանգարող հարկային դաշտի մասին լսելու համար, սակայն Փաշինյանը գերադասեց կրկին հերոսացնել իրեն ու իր թիմին, իսկ դրանից տնտեսությանը հասած օգուտը լավագույն դեպքում 0 է, վատագույնի դեպքում՝ վայրընթաց:

NEWSPRESS.am