«Էս երկրում էլի զանգերո՞վ են աշխատում»․ կենդանասերները պնդում են՝ տնօրենը ոչնչացնում է կենդանիներին (տեսանյութ)

«Ռուբեն հեռացիր», «Վերջ կենդանիների ոչնչացմանը» և այլ համանման պաստառներով Երևանի կենդանաբանական այգու դիմաց ընթանում է բողոքի ակցիա։

Նախաձեռնող խմբի անդամները նկատում են, որ թեև արդեն տևական ժամանակ է բարձրաձայնում են խնդիրը, բայց քաղաքապետարանին չի մտահոգում այն: Դեռ նախորդ տարվա աշնանը կենդանասերներն աշխատանքային խումբ էին ձևավորել և հանդիպել քաղաքապետ Հայկ Մարությանի հետ՝ ներկայացնելու Կենդանաբանական այգու խնդիրները։ Սակայն այն աշխատեց շատ կարճատև ժամանակ, քանի որ երկու աշխատանքային հանդիպումից հետո այլևս հանդիպումներ չեն կազմակերպվել։

Ակցիայի կազմակերպիչների թվում են նաև այգու նախկին աշխատողներ, ովքեր վստահեցնում են, որ կենդանիները ոչնչանում են տնօրեն Ռուբեն Խաչատրյանի թեթև ձեռքով։ Նրանք նկատում են նաև, որ դեռևս 2011 թվականից կան հարուցված գործեր, որոնք մինչ օրս չեն բացահայտվել ու արդյունք չեն ունեցել։

«Ես չեմ հասկանում՝ քաղաքապետարանում չե՞ն տեսնում, թե ինչ ա կատարվում։ Ռուբեն Խաչատրյանը լավ տիրապետում ա խնդրին ու երևի կարողանում ա խաբել քաղաքապետին։ Մեր աշխատողներից ովքեր բարձրաձայնել են խնդիրը՝ աշխատանքից ազատել են»,- լրագրողների հետ զրույցում ասաց նախկին աշխատողներից Մանուկ Մանուկյանը։

Մասնագետներից Արևիկն էլ նկատեց, որ եթե իրավաբանները մինչ օրս հարցին լուծում չեն տվել, ապա հավանաբար գործում է նախկին համակարգը՝ զանգերի միջոցով հարցեր են լուծում։

«Երկրում էլի զանգերո՞վ են աշխատում»,- ասաց Արևիկը, ով նկատում է, որ կասկածներ ունի նաև վագրերին քնեցնելու հետ կապված խնդրի հետ։

Մանրամասները՝ տեսանյութում