«Պետք է կառավարության քաղաքական ուղերձը լինի, որ 3 ամիս առաջ սխալվել են»․ Մելքումյան (տեսանյութ)

Շրջանառության հարկի շեմի բարձրացման արդյունքում բյուջեի հարկային եկամուտների կորուստը կկազմի 11.5 մլրդ դրամ: Այս մասին Ազգային ժողովում Հարկային օրենսգրքի թեմայով խորհրդարանական լսումների ժամանակ ասաց ֆինանսների փոխնախարար Արման Պողոսյանը։

Նա նշեց, որ Հարկային օրենսգրքի փոփոխությունների նախագծով նախատեսվում է շրջանառության հարկի շեմը վերականգնել 115 մլն դրամ, բայց միայն նրանց համար ովքեր նախքան օրենքն ուժի մեջ մտնելու պահը, չեն գերազանցել 58.35 մլն դրամի շեմը։

«Նախագիծը նախատեսում է հետադարձ ուժով կիրառում, եթե օրենքի՝ ուժի մեջ մտնելու պահին որևէ վճարող դեռ չի հատել 58.35 մլն դրամի սահմանագիծը, հետևաբար, չի համարվել ավելացված արժեքի հարկ վճարող, նրա համար շեմը վերականգնվում է 115 մլն դրամի մակարդակում: Իսկ եթե որևէ մեկն արդեն հատել է սահմանագիծն ու արդեն դարձել ավելացված արժեքի հարկ վճարող, նախագիծը չի ենթադրում, որ նա նորից պետք է վերականգնվի շրջանառության հարկ վճարողի կարգավիճակում»,- բացատրեց Պողոսյանը:

Արձագանքելով նրան՝ ԱԺ «Բարգավաճ Հայաստան» խմբակցության պատգամավոր Միքայել Մելքումյանը ողջունեց նախագիծը, սակայն հիշեցրեց, որ դեռ տարեսկզբին իրենց կողմից ներկայացվեց այդ նախագիծը, այն ժամանակ կառավարությունը բացասական եզրակացություն տվեց։

«Երբ 3-4 ամիս առաջ մենք ասում էինք, որ 115-ի շեմը նույնը թողնելը պրոբլեմային է և պաշտոնապես կառավարությունը բացասական է դա համարել ու հիմա նույն եզրակացության է եկել՝ նշանակում է պետք է ընդունի, որ սխալվել է, ոչ թե ասի 58-ից շեմը չի անցել՝ դա առնվազն արդար չի։ Այսինքն՝ մենք ասում ենք՝ դուք հունվարի 8-ից անցեք այդ շեմը, բայց հետո դուք հետ գնալ չե՞ք կարող»,- նկատեց Մելքումյանը։

Նա նկատեց, որ 50 մլն-ից հետո ՀԴՄ կտրոն չեն խփում, ու դրա վնասն ավելի շատ է եղել խաղի կանոների պահպանման առումով։ 

«Ուղղակի պետք է քաղաքական ուղերձ լինի, որ 3 ամիս առաջ սխալվել ենք՝ ինչ պատճառով, դա թող արդեն կառավարությունը մտածի»,-ասաց Մելքումյանը։

Մանրամասները՝ տեսանյութում։