«Սպայկա»-ի տնօրենին կալանքի տակ պահելը տնտեսական լուրջ ճգնաժամ կարող է առաջացնել․ փաստաբան (տեսանյութ)

Վերաքննիչ դատարանը հրապարակեց «Սպայկա» ընկերության տնօրենի կալանքի հարցով որոշումը, ըստ որի` Դավիթ Ղազարյանը կմնա կալանքի տակ: Այս մասին լրագրողների հետ զրույցում տեղեկացրեց նրա պաշտպան Արսեն Սարդարյանը:

Վերջինիս գնահատմամբ` Դավիթ Ղազարյանին կալանավորումն ուժի մեջ թողնելու վերաբերյալ Վերաքննիչ դատարանի որոշումը գործարարից գումար կորզելու մեխանիզմ է։

«Պաշտպանական կողմն ասում է՝ կա ենթադրյալ չվճարված հարկ և այդ հաշվարկն իրականացվել է վարույթն իրականացնող մարմնի կողմից կազմված տեղեկանքի հիման վրա, որն ուղարկվել է փորձագետների, որոնք էլ ընդամենn ասել են, թե թվերն իրար ճիշտ են գումարած, թե՞ ոչ»,- ասաց Արսեն Սարդարյանը։

Նրա խոսքով` նախաքննական մարմնի միակ պատճառաբանությունն այն է, որ ընկերության ղեկավարը հեղինակավոր անձ է, և նրա հեղինակությունը կարող է ազդել քննության վրա։

«Ի՞նչ է նշանակում դա․ Է, էդ դեպքում եկեք Սահմանադրությամբ ամրագրենք, որ ազատության երաշխիքները մեր երկրի հեղինակավոր անձանց համար չեն գործում, այսինքն` անձը պետք է հեղինակազո՞ւրկ լինի, որ նրա ազատության իրավունքն ապահովվի»,- ասաց փաստաբանը։

Բացի այդ, Արսեն Սարդարյանը վստահեցնում է, Ղազարյանին կալանքի տակ պահելը տնտեսական լուրջ ճգնաժամ կարող է առաջացնել. այսինքն՝ առկա է նաև հանրային շահ։

«Ղազարյանը «Սպայկա» ընկերության միակ հիմնադիրն է. նա իր բիզնեսը ստեղծել է երկար տարիների քրտնաջան աշխատանքի շնորհիվ, և գործընկերները ճանաչում են նրան և նրա հետ են աշխատում, նրան կալանքի տակ պահելը կարող է ծանր հետևանքներ առաջացնել՝ հաշվի առնելով «Սպայկայի» դերը գյուղմթերքի արտահանման և տնտեսության մեջ»,- ասաց փաստաբանը։

Մանրամասները՝ տեսանյութում