ԴԱՀԿ Միհրանի ծաղկեփնջից միչև ծառայողական մեքենաներ

Յուրաքանչյուր իշխանության լավ կամ վատ աշխատանքի գնահատականը տալիս է տվյալ երկրի աղքատության մակարդակի ցուցիչը, կոռոպցիան և արտաքին պարտքը: Հայաստանը միջազգային վարկանիշով 129 երկրների շարքում 33-րդ տեղն է զբաղեցնում աղքատների թվաքանակով, իսկ ըստ սոցհարցումների` մեր երկրում աղքատ է ազգաբնակչության 50 տոկոսը, որից 19 տոկոսը` ընչազուրկ: Աղքատության այս ֆոնին մեր երկրի արտաքին պարտքը 1.6մլրդ-ից հասել է 5.6մլրդ: Միայն Հովիկ Աբրահամյանն իր պաշտոնավարման օրից հասցրել է ՀՀ պարտքը ավելացնել 1.7 մլրդ-ով: Ամենապարզ հաշվարկներով մեր աղքատ երկրի յուրաքանչյուր քաղաքացի իր ուսերին այսօր, անկախ իր կամքից, ունի 1600 դոլարին համարժեք պարտք:

Կոռուպցիան իր չափերով անգամ Հայաստանի հեղինակությունն է դրել կասկածի տակ. կասկածելի այդ մթնոլորտում Հովիկ Աբրահամյանը հակակոռուպցիոն խորհուրդ է ստեղծում իր իսկ գլխավորությամբ և ֆինանսների նախարարի մասնակցությամբ, ում անունները տարբեր լրատվամիջոցների կողմից տարբեր ժամանակահատվածներում կոռուպցիոն մեղադրանքների թիրախում են հայտնվում:

Խորհրդի ստեղծումից ամիսներ հետո Հայաստանում համատարած կոռուպցիայի մասին ահազանգ է հնչեցնում Հայաստնում ԱՄՆ դեսպանը: Բայց որքան ահազանգը բարձր է հնչում` իշխանությունն ավելի ցինիկ է պատասխանում: Օրեր շարունակ, զարգացած տարբեր երկրների օրինակով ապացուցվում էր, որ Հայաստանում ծառայողական ավտոմեքենաների քանակը հատել է բարոյական նիշը: Ու հենց այդ թեժ մթնոլորտում կառավարությունը որոշում է ԴԱՀԿ-ին սպասարկող ավտոմեքենաների թիվը 34- ից հասցնել 54-ի` արդարադատության նախարարի առաջարկով:

Հասկանալի է, որ ԴԱՀԿ պետը լայն ժպիտով ու գեղեցիկ ծաղկեփնջով դիմավորեց գեղեցկուհի նախարարին, բայց արժե՞ր դրա համար նման մեծ շնորհի արժանացնել ԴԱՀԿ-ին, որի պետ Միհրան Պողոսյանի գիտությամբ ամիսներ շարունակ հազարավոր քաղաքացիներ իրենց գույքով հայտնվեցին կալանքի ու քաշքշուկի մեջ:

Ի դեպ այս չինովնիկի մասին ժամանակին մամուլը գրում էր, որ նրա կարիերայի սահուն առաջխաղացումը ապահովել են մորեղբայրները` Գրիգոր և Միքայել Հարությունյանները: Հիմա Միհրանի առաջխաղացումն են ուզում ապահովել երիտասարդ նախարարն ու վարչապետը: Գուցե նախարարի կողմից մի առաջարկ էլ արվի տիկնիկային թատրոնի տնօրենի՞ն, որպեսզի Գալուստ Սահակյանից հետո անհաղթ աքլորի արձանիկներ նվիրի մեր մյուս չինովնիկներին, ովեր ամեն օր աքլորակռիվ են հայտարարում ընչազուրկ ժողովրդին:

Հասմիկ Աբրահամյան