Գործազուրկ եմ դառնում, էլ էս երկրում մնում ենք, որ ի՞նչ անենք․ Նար-Դոսի կրպակները քանդում են

Աշոտ Ղարիբյանը 9 տարի է` արդեն աշխատում է Նար-Դոսի փողոցի կրպակում։ Այսօր՝ ապրիլին 29-ին, Երևանի քաղաքապետարանի որոշմամբ, փողոցի կրպակները քանդում են։

Աշոտ Ղարիբյանը պնդում է, որ 9 տարի կրպակն օրինական գրանցված է եղել ու այսօր այն անօրինական են քանդում։

«Էս պահին ինձ ավելի մեծ վնաս են պատճառում, քան այս կրպակը դնողին։ Ես գործազուրկ եմ դառնում։ Ստիպված ենք արդեն այլ երկրներից ապաստան խնդրել, մնում ենք այստեղ որ ի՞նչ անենք։ Ճար չկա»,- ասաց Աշոտ Ղարիբյանը։

Մեկ այլ կրպակի սեփականատեր Ֆելիքս Միքայելյանն էլ նկատում է, որ 6 կրպակ ուներ և ոչ մի համաձայնություն ձեռք չի բերվել։ 15 օր առաջ որոշում են ներկայացրել, բայց չեն պատկերացրել, որ այն այսքան արագ կիրականացնեին։

Դիտարկմանը, թե խոսում են այլ տարածքի ձեռք բերման մասին, Ֆելիքս Միքայելյանը պատասխանեց․

«Կիլիկիայի վերջին քարի հանքերն են ասում, ի՞նչ անեմ, այնտեղ քա՞ր եմ տաշելու»,- ասաց նա և հավելեց, որ ինքը Նար-Դոսում փայտամշակմամբ է զբաղվում:

Հարցին՝ հնարավո՞ր է դատական գործընթաց սկսի, վերջինս պատասխանեց. «Որ սկսեմ, ի՞նչ օգուտ, եթե օգուտ կունենա, որ կբերեմ, կդնեմ տեղը՝ կանեմ, բայց օգուտ չունեմ: Այսօր օրենքո՞վ է որ, օրենքը ժողովրդի կո՞ղմն է, չկա նման բան, օրենքն իրենցն է, իրենք էլ իրար մատ չեն կծում, անում են այն, ինչ հարմար է իրենց»:

Նա նշեց նաև, որ չի թողել իր կրպակը ջարդեն:

«Վաղը ես ինքս կհանեմ, որովհետև սա իրենով գումար է: Չթողեցի ջարդեն, ես ավելի լավ է մեկին նվեր տամ, քան էսպես ջարդեն թափեն, մեկին լավություն կանեմ, ինձ էլ պետք չի»,- եզրափակեց նա: