Դրոշը թեք էր ու կեղտոտ. Մխիթարին ճամփեք տուն (ֆոտո)

Երկակի ստանդարտների կամ ծուռ հայելիների երկիր. ինչպես ցանկանաք, կարող եք որակում տալ Հայաստանում ծավալվող քաղաքական իրադարձություններին, բայց դրանից իրավիճակը չի փոխվում: Հավանաբար, կհիշեք վերջերս տեղի ունեցած դեպքը, երբ Նիկոլ Փաշինյանը ՊԵԿ այցելության ժամանակ աշխատակցին հրահանգեց ազատվել աշխատանքից` դրոշը գետնին փոշոտ վիճակում դնելու համար, սակայն այսօր Փաշինյանը լռում է, երբ իր պատգամավորն է անհարգալից վերաբերմունք ցուցաբերում ՀՀ դրոշի հանդեպ:

Ստացվել է այնպես, որ կատարվածը կրկնում է իմքայլական պատգամավոր Մխիթար Հայրապետյանը: Նա իր տան դռան վերևում կախել է մի դրոշ, որն այդքան էլ Հայաստանի դրոշը չէ, բացի այդ փոշոտ է, ինչպես ՊԵԿ աշխատակցի դեպքում:

Իրավիճակ է փոխվել, դրոշին անհարգալից վերաբերմունք է ցուցաբերել Փաշինյանի թիմակիցը, հեղափոխության «գաղափարական ուղեղը», նրա դեպքում՝ աշխատանքից ազատում չկա, անգամ որևէ արձագանք չի լինի, ինչո՞ւ՝ որովհետև «մեր Մխոն է»:

Հեղափոխականներին ամեն ինչ կարելի է՝ դրոշը կապել մեքենայի «կապոտին», փռել գետնին՝ նստել վրան, կամ ինչպես մեր մի հոդվածում էինք՝ գրել հագնել կոշիկներում, բայց այս ամենը չի կարելի հեղափոխությանը չմասնակցածներին:

Հասարակությունն արդեն վաղուց բաժանված է սևերի ու սպիտակների, մերոնքականի ու հակահեղափոխականի, և դա է պատճառը, որ Հայաստանում հիմք դրվեց ոչ թե սիրո և հանդուրժողականության, այլ ատելություն և ծուռ հայելիների պետության:

Ի դեպ, այս օրերին Մխիթար Հայրապետյանը ոչ միայն աչքի ընկավ իր՝ դրոշը թեք ու կեղտոտ կախելու լուսանկարով, այլ նաև հարցազրույցներից մեկով, որտեղ նշում էր, թե իրատեսական չի համարում մեծ հայրենադարձություն սկսելու հնարավորությունը, քանի որ այս փուլում մեծ հայրենադարձություն սկսելու խնդիր պետությունն իր առջև չի կարող դնել։

Սա այն նույն պաշտոնյան է, ով Սփյուռքի նախարար լինելու շրջանում ասում էր՝ մայիսից սկսած, 2018թ. 7 ամիսների ընթացքում Հայաստան է հայրենադարձվել ավելի քան 450 ընտանիք և այս թիվը վերաբերում էր միայն այն ընտանիքներին, որոնք կապվել էին իրենց հետ, այսինքն՝ այս թիվը չի ներկայացնում իրականությունն ամբողջությամբ և թիվն անհամեմատ մեծ էր:

Մանկական խանդավառությամբ նման հայտարարություն արած մարդն այսօր հակառակ պնդումն է կատարում՝ հայրենադարձությունը ևս սառույցին գրելով: Այսպես շարունակելու դեպքում կարելի է կազմել ու գույքագրել Նիկոլի ու իր թիմակիցների ստերի մի հաստափոր դավթար և ճանապարհել տուն, կրկին փաբերում խմել ծխելու:
Իրականում հեղափոխական թիմը մեր պետության համար այդպես էլ օգտակար չեղավ և միայն պետությունը նրանց տվեց հսկա աջակցություն ու կենսագրականները ճոխացնելու մեծ հնարավորություն:

NEWSPRESS.am