Տուլայի վթարից տուժածների հարազատներին օգնություն դեռ չեն տրամադրել

«Անհանգիստ վիճակում ենք, եղբորս հետ  կապ չենք կարողնում հաստատել, լրատվական կայքերից ենք եղբորս մասին տեղեկություններ իմանում»,- newspress.am-ի հետ զրույցում ասաց նոյեմբերի 3-ին Տուլայում վթարված ավտոբուսի վարորդներից մեկի` Գառնիկ Հարությունյանի եղբայրը` Հարություն Հարությունյանը:

Նրա խոսքով `Հայաստանում, որևիցե մեկը օգնության ձեռք չի մեկնում. «Գիտեք, այն տպավորությունն է, որ Հայաստանի քաղաքացու հետ չի այդ դժբախտ դեպքը պատահել ու հայը չի նման իրավիճակում հայտնվել օտար երկրում: Այսպիսի անուշադրություն մեր կառավարության կողմից չէինք սպասում»,-ասաց Հարությունը:

Նա մանրամասնեց, որ եղբոր կարգավիճակը պարզ կլինի միայն երեք ամսից հետո . «հիմա պատկերացնում եմ եղբորս վիճակը` անորոշության մեջ հայտնված, կողքը որևէ մեկը չկա, որ օգնի: Միայն գիտենք, որ մեղադրյալի կարգավիճակ են տվել, գոնե տեղափոխեին Հայաստան, այստեղ պատիժը կրի: Հույսներս Աստծո վրա ենք դրել, գուցե մեզ օգնի»:

Հիշեցնենք, որ   Գառնիկ  Հարությունյանին մեղադրանք  է  առաջադրվել, իր կողմից  տրանսպորտային միջոցի շահագործման  հետևանքով երկու  և ավելի  անձանց մահվան  մասով: Այժմ ավտոբուսի վարորդը գտնվում է մեղադրյալի կարգավիճակում: Նրան սպառնում է մինչև 7 տարվա ազատազրկում։

Ավելի վաղ Տուլայի դատարանը որոշում էր կայացրել վարորդին կալանքի տակ պահել մինչև 2016 թվականի հունվարի 3-ը։ Ավտովթարի զոհերի ընտանիքներն ու տուժածները դեռ փոխհատուցում չեն ստացել կառավարության կողմից

Կապի և տրանսպորտի նախարարության մամուլի հետ կապերի բաժնից տեղեկացրեցին, որ դեռ ցուցակներն են հաստատվում. «Ճշտվում են զոհվածների այն հարազատների տվյալները, ում պետք է տրամադրվի օգնությունը»:

Հիշեցնենք, որ նոյեմբերի 3-ին ժամը 03.08-ին Տուլայի տարածաշրջանի Ուզլովսկիյ շրջանի Իլինկա գյուղի մոտակայքում Մոսկվա-Երևան երթուղու «Կինգ Դելյուքս» ՍՊԸ տրանսպորտային ընկերությանը պատկանող ավտոբուսը դուրս էր եկել երթևեկելի մասից և շրջվելշ: Զոհվել էին 9, տուժել՝ 43 ՀՀ քաղաքացի: Վթարի ենթարկված ավտոբուսը պատկանում է Աբովյանի քաղաքապետի նախկին թեկնածու Արթուր Հարությունյանի «Քինգ դե լյուքս» ընկերությանը: