Հերթական սերիան նկարված է, մնում է «մուծվելը»

Տևական ժամանակ հասարակությունը բեմադրված շուների ականատես չէր եղել: 
Հիշեցնենք, որ թոփ շուների տասնյակին են դասվում Սերժ Սարգսյանի եղբոր, նախկին վարչապետ Հովիկ Աբրահամյանի, Սերժ Վաչոյի, Մանվել Գրիգորյանի տներում սև ժիլետավոր ԱԱԾ-ականների այցերը։

Մամուլի էջերում արդեն տևական ժամանակ է` նախկին պաշտոնյաների տներ ուժայինների ներխուժումները չեն հայտնվում, ուստի ժամանակն էր լրացնել բացն ու բեմադրել այդ ֆիլմի հերթական սերիան, ինչն էլ այսօր տեղի ունեցավ։

Պարզվում է՝ մինչ ԴԱՀԿ նախկին պետ ու նախկին հանրապետական պատգամավոր Միհրան Պողոսյանը հարուցված քրեական գործով զբաղվող քննիչին տալիս է Մոսկվայում իր բնակության վայրի հասցեն ու հայտնում, որ չի թաքնվելու նախաքննությունից, Հատուկ քննչական ծառայությունը որոշում է խուզարկություն իրականացնել Միհրան Պողոսյանի բնակարանում, իսկ ԱԱԾ-ի սևժիլետավոր ջլապինդ տղաներն էլ ապահովում են խուզարկության բնականոն ընթացքը։

Եթե Սաշիկ Սարգսյանի տանից խուզարկության արդյունքում ՀՔԾ և ԱԱԾ աշխատակիցները հանեցին թանկարժեք նկարներ, Հովիկ Աբրահամյանին փաստացի պատկանող տարածքներից մեծ թվով զենք ու զինամթերք, Սերժ Վաչոյի տանից ու ավտոտնակից էլ՝ տոպրակներով գումարներ, Միհրան Պողոսյանի տան խուզարկության ավարը շատ ավելի համեստ էր․ մեկ-երկու փոքրիկ արկղ, մոնիտոր և ինչ-որ փաստաթղթեր։

Թե ինչ ունեցանք Հովիկ Աբրահամյանի, Սերժի Վաչոյի, Սաշիկ Սարգսյանի տան խուզարկություններից հետո, հիշում ենք բոլորս․ նրանց մասին գրեցին, հետո հարուցվեց քրգործ: Որևէ մեկը կալանավորված չէ, փողերը «մուծվել» են ու կոռուպցիոներ թալանչիները հանգիստ վայելում են կյանքը։ Սրան զուգահեռ ունենք կոռուպցիայի դեմ պայքարող իշխանության իմիտացիա ու վարչապետի կողմից աջ ու ձախ հպարտանալու առիթներ՝ ընդհուպ ԵԽԽՎ ամբիոնից։

Ակնհայտ է, որ նույն սխեման է գործելու նաև Միհրան Պողոսյանի պարագայում, եթե իհարկե, նա չարժանանա ՊՆ նախկին նախարար Միքայել Հարությունյանի, Մարտի 1-ի դեպքերի ժամանակ փամփուշտները փոխած Վահագն Հարությունյանի կամ 14 մլն դրամ կաշառք ստանալու մեջ մեղադրվող Արամ Հարությունյանի ճակատագրերին. Ռուսաստանը նրանց պարզապես չի արտահանձնում Հայաստանին։

Լավագույն դեպքում, պետք է մնանք կուլիսային պայմանավորվածությունների արդյունքում փողերը «մուծվելու» հույսին․ մինչ այս պահը գործող միակ տարբերակը դա է, իսկ քանի որ երեկ Ազգային ժողովում վարչապետ Փաշինյանն ասաց, որ փողեր «մուծվելու» գործընթացի տեմպերն իրեն չեն բավարարում, չի բացառվում, որ Միհրան Պողոսյանը «մուծվի» շատ ավելի շատ զրոներով, քան ասենք Սաշիկը․․․

NEWSPRESS.am