Ում ցուցմունքով Սանասարյանը դարձավ կասկածյալ

Թեև Պետական վերահսկողական ծառայության պետ Դավիթ Սանասարյանը կառավարության նիստերից հետո լրագրողներին դուխով խորհուրդ էր տվել իրեն ուշադիր նայել ու հասկանալ՝ արդյոք ինքը բռնվողի նմա՞ն է, բայց պարզվում է, որ այո՛, լավ էլ նման է, այլ է խնդիրը, որ ինքն իրեն հայելու մեջ նայելիս դա չի տեսնում։

«Փաստինֆո»-ի տեղեկություններով` ՊՎԾ աշխատակիցներին վերաբերող քրեական գործով ՊՎԾ պետ Դավիթ Սանասարյանը ներգրավվել է որպես կասկածյալ:

Նրա նկատմամբ խափանման միջոց է ընտրվել ստորագրությունը չհեռանալու մասին։

Հիշեցենք, որ Ազգային անվտանգության ծառայությունը քրեական գործ է հարուցել ՀՀ պետական վերահսկողության ծառայության պաշտոնատար անձանց կողմից պաշտոնեական դիրքի չարաշահմամբ պետական գնումների գործընթացին առերևույթ ապօրինի միջամտելու և օրինական ձեռնարկատիրական գործունեության համար խոչընդոտներ ստեղծելու դեպքերի առթիվ՝ ՀՀ քրեական օրենսգրքի 308-րդ հոդվածի 2-րդ մասի և 325-րդ հոդվածի 2-րդ մասի հատկանիշներով։

Քրգործի հարուցումից հետո ՊՎԾ երկու աշխատակից կալաավորվեց, իսկ ավելի ուշ այդ կալանավորված անձանցից մեկը դատավարական հսկողություն իրականացնող դատախազի որոշմամբ ազատ արձակվեց։ Խոսքն այս պարագայում Գևորգ Խաչատրյանի մասին է, ով ՊՎԾ-ում մրցույթների օրինականության նկատմամբ հսկողություն իրականացնողն է եղել։

Պարզվում է, որ Գևորգ Խաչատրյանը համագործակցել է նախաքննական մարմնի հետ ու տվել ցուցմունքներ, բացի այդ՝ առերեսվել է նաև Սանասարյանի հետ։

Արդեն իսկ կասկածից վեր է, որ Խաչատրյանի նկատմամբ ընտրված կալանքը հենց այնպես չի փոխվել ստորագրության. հավանաբար, հենց նրա կողմից տրված ցուցմունքներն են հիմք հանդիսացել Դավիթ Սանասարյանին որպես կասկածյալ ներգրավելու համար, մինչդեռ անպարտելի Սանասարյանը աջ ու ձախ դուխով հայտարարում էր, որ աննահանջ պայքար է մղելու կոռուպցիայի դեմ։

Նոր Հայաստանում թավշյա հերթական պաշտոնյայի շուրջ հարուցվող քրեական գործը կարող է վերջին ուժգին հարվածը հասցնել Նիկոլ Փաշինյանին։

Հիշեցնենք, որ նոր Հայաստանում մենք արդեն ունենք կաշառքի գործով կալանավորված՝ առողջապահության՝ արդեն նախկին փոխնախարար։

Ստացվում է՝ կոռուպցիայի դեմ պայքարն իշխանավորներին չի հաջողվում այնպես, ինչպես դա չէր ստացվում նախորդների մոտ․ բացառությամբ մեկ տարբերության. ներկաներն արագ-արագ բռնվում են, իսկ այն, որ Սանասարյանը գնում է բռնվելու ճանապարհով, մամուլը գուժում էր ամիսներ շարունակ։

NEWSPRESS.am