Ինչու բանանի արքայի համար մուծվելու պահը հենց հիմա ընտրվեց

Այսօր հայտնի դարձավ, որ ԴԱՀԿԾ նախկին ղեկավար և նախկին պատգամավոր Միհրան Պողոսյանը Հատուկ քննչական ծառայություն է հրավիրվել հարցաքննության, բայց եթե ավելի վաղ նա հրավիրվում էր որպես վկա, ապա այժմ` որպես մեղադրյալ:

Մի կողմ թողնելով հարցը, թե ինչպես Պողոսյանը վկակից դարձավ մեղադրյալ, ուզում ենք հիշեցնել, որ այս ձեռագիրը նույնն էր նաև Ռոբերտ Քոչարյանի պարագայում. Նա ևս վկայից դարձավ մեղադրյալ շատ կտրուկ քայլով:

Ինչևէ, արդեն ունենք արձանագրված փաստ. Միհրան Պողոսյանը մեղադրյալ է. Նա մեղադրվում է չարաշահումներ անելու կամ ինչպես ընդունված է ասել՝ պետությունը թալանելու հանար:

Կկարողանա՞ արդյոք ՀՔԾ ն ապացուցել այս մեղադրանքը, դեռ հարց է, սակայն այստեղ ուզում ենք ուշադրություն հրավիրել Պողոսյանին մեղադրանք առաջադրելու ժամկետի վրա:

Գաղտնիք չէ, որ իշխանության վարկանիշն օր օրի նվազում է, իսկ սոցիալ տնտեսական խնդիրները հստակ հարցադրումներ են առաջացնում, որոնք պետք է ստանան պատասխաններ, ինչը չունի գործող իշխանությունը: Առաջացել են ակնկալիքներ և սպասումներ ունեցող հատվածին մի բանով զբաղեցնելու և մամուլի ուշադրությունը ցավոտ հարցերից շեղելու խնդիրներ, իսկ դրա միակ և ամենակարճ ճանապպրհը պետությունը կեղեքողին բռնելն է, ուստի հերթը հասել է Պողոսյան Միհրանին: Բանանի արքայի շուրջ հարուցվող քրեական գործը առժամանակ կզբաղեցնի բոլորի ուշադրությունն, ինչպես որ դա եղավ Սերժի Վաչոյի, Սերժ Սարգսյանի եղբոր, եղբոր որդի Գոնսալեսի, Հովիկ Աբրահամյանի ու այլ հայտնի դեմքերի հետ, որոնցից ոչ մեկը բերդի ասֆալտին չպառկեց. հարցը լուծվեց մուծվելով, և հիմա նույնն անելու ժամանակը Միհրան Պողոսյանինն է:

NEWSPRESS.am